सहकारी कप बुद्धिचालया उपाधी सजिनयात

यल – ताम्रकार समाज व ललितपुर स्पोर्टस क्लबया मंकाः ग्वसालय् न्ह्यानाच्वंगु न्हय्क्वःगु गणेशमान सिंह सहकारी कप बुद्धिचाल कासाया उपाधी जनता साकोसय सजिन महर्जनं त्याकूगु दु । सजिनं फाइनल चरणया कासाय् गोल्डेनगेट कलेजया मिलन लामायात बुकाः उपाधी त्याकूगु खः ।

उपाधी वापत सजिनं निगू लाख तका वंगु यामाहा मोटरसाइकल ल्हातय् लाकूगु दु । ‘बेस्ट अफ टू’या आधारय् जूगु कासाय् हाकुगु गट्टी कयाः म्हितूम्ह सजिनं न्हापांगु कासाया २३ औ चालय् मिलनं याःगु गल्तीया लबः काःगु खःसा निगूगु कासाया ३३ औ मिनेटय् बराबरीया प्रस्तावयात स्वीकार यासें उपाधी त्याकूगु खः ।

कासाय् लिउ लाःम्ह मिलनं न्यय्द्वः तका स्वंगूगु थासय् लायेत सफल मदनकृष्ण कायस्थं स्वीद्वः प्यंगूथासय् लाःम्ह रिजेन्द्र राजभण्डारीं व रुपेश जयसवालं नीन्याद्वः तका ल्हातय् लाकल । मिसापाखे विनिता कपाली ५.५ अंक प्राप्त यानाः उपाधी त्याकेगु झ्वलय् १० द्वः तका दां प्राप्त यात ।

क्लबया अध्यक्ष हेराकाजी महर्जनया सभापतित्वय् जूगुु ज्याझ्वलय् प्रतिनिधिसभा सदस्य नापं नेपाल ओलम्पिक कमिटीया अध्यक्ष जीवनराम श्रेष्ठं विजेता कासामिपिंत नगद सिरपाः नापं ट्रफी लःल्हानादिल । उगु इलय् फिडेया ईथिक्स कमिसनया दुजः राजेशहरी जोशी, नेपाल बुद्धिचाल संघया अध्यक्ष एकराज श्रेष्ठ, ताम्रकार समाजया अध्यक्ष रविन्द्रराज ताम्रकार लगायतं नं कासामिपिंत सिरपाः व दसिपौ लःल्हानादीगु खः ।