ओमिक्रोन भेरियन्टयात फाइजरया बुस्टर डोज प्रभावकारी

एजेन्सी- कोरोना भाइरसया न्हूगु भेरियन्ट ओमिक्रोनविरुद्ध फाइजर खोपया बुस्टर डोज प्रभावकारी जूगु खोप निर्माता कम्पनी फाइजर–बायोएनटेकं धाःगु दु । कम्पनीं बिउगु जानकारीकथं छगू अनुसन्धान लिपा फाइजर खोपं कोरोनाया भेरियन्टविरुद्ध निगू डोजं रोग प्रतिरोधी क्षमता विकास यानाच्वंगु व न्हूगु भेरियन्ट ओमिक्रोन विरुद्ध स्वंगूगु डोजं रोग प्रतिरोधी क्षमता विकास जूगु दु ।

फाइजर निर्माता कम्पनीं छगू विज्ञप्ति पिकयाः फाइजरया स्वंगू डोजं ओमिक्रोन विरुद्ध एन्टीबडीया विकास जुइगु धाःगु खः । कम्पनीं खोपयात कयाः अनुसन्धान जुयाच्वंगु व ओमिक्रोनयात लक्षित यानाः खोपया विकास जुयाच्वंगु व मेगु १०० न्हुया दुने खोप वितरण यायेत तयार जुइगु नं धाःगु दु ।

विश्व स्वास्थ्य संगठनं आः दुगु खोपं हे ओमिक्रोनविरुद्ध ज्या याइगु धायेधुंकूगु दु ।

ओमिक्रोन भेरियन्टया कोरोना भाइरस विश्वया ५० गू सिबें अप्वः देसय् खनेदयेधुंकूगु दु । दक्षिण एसियाया न्यागू देसय् थ्व भाइरस खनेदयेधुकलं । नेपाः, भारत, श्रीलंका, माल्दिभ्स व पाकिस्तानय् थ्व भाइरस खनेदुगु खः । थ्व भेरियन्ट दकलय् अप्व भारतय् २० म्हसिबें अप्व मनूतय्के खनेदुगु दु । पाकिस्तानया कराँचीइ बिहिवाः ओमिक्रोन खनेदुगु खः । नेपालय् निम्हेसिके ओमिक्रोन खनेदुगु खःसा निम्हेसिगु रिपोर्ट नेगेटिभ वयेधुंकूगु दु ।