रेडक्रस आः प्यंगू तहया संरचनाय्

येँ – मानवीय सेवाय् दकलय् अग्रणी संस्था नेपाल रेडक्रस सोसाइटी (नेरेसो) नं आः संघीय संरचनाय् वनीगु जूगु दु । नेरेसों संघीय संरचनाकथं थःपिनिगु सांगठनिक संरचना हिलेगु निर्णय याःगु खः । विराटनगरय् नकतिनि क्वःगु ४७ क्वःगु महाधिवेशनं विधानयात ईकथं ल्वयेक हिला यंकागु केन्द्रीय सभापति संजीव थापां कनादिल ।

वय्कलं महाधिवेशनं राज्यया थीथी तहय् क्वःछिनातःगु कार्यकारी पदय् निर्वाचित जूम्ह आः नेरेसोया गुगुं नं तहया प्रमुख पदाधिकारी जुइ मदइगु नं जानकारी बियादीगु दु ।अथे हे प्रतिनिधिसभा व प्रदेशसभाया सदस्य जूम्ह नं नेरेसोया गुगुं नं तहया कार्यसमितिया पदाधिकारी जुइ मदइगु कथंया आचारसंहिता नं जारी यानागु जानकारी वय्कलं बियादिल ।

विराटनगर महाधिवेशनं नेरेसोयात आः स्थानीय, जिल्ला, प्रदेश व केन्द्र यानाः प्यंगू तहय् सांगठनिक संरचनाय् यंकेगु निर्णय याःगु खः । रेडक्रसया मूल मर्मकथं सुरक्षित पहुँचया प्यंगू तत्वयात पालना यानाः वइगु दिनय् मानवीय सेवाया सर्वोच्च सेवाय् अनवरत रुपं थःपिनिगु ज्याझ्वः व गतिविधियात अझ प्रभावकारी रुपं संचालन यायेत नं निर्देश याःगु दु ।