‘निर्वाचन प्रक्रिया दिकेमाःगु मदु’

येँ- पुलांम्ह प्रमुख निर्वाचन आयुक्त सूर्यप्रसाद श्रेष्ठं नेपाल कम्युनिष्ट पार्टीया आधिकारिकता विवाद निरुपणय् निर्वाचन आयोग प्रभावित जुइ मजिउगु खँ धयादीगु दु । नेकपाया निगुलिं पक्षं आधिकारिकताया दावी यानाच्वंगु इलय् आयोग ख्याच्वः व आन्दोलनं मग्यासें कानुन स्वयाः विवाद निरुपण यायेगु माःगु खँ धयादीगु दु ।

वय्कलं धयादी, ‘निर्वाचन आयोग संवैधानिक आयोग खः, संविधानं क्वःछिनातःगु स्पष्ट क्षेत्रधिकार दु, आयोगया पदाधिकारीपिंत सरकारं नियुक्त याःसां नं ज्या कानुन कथं यायेमाः ।’ वय्कलं ताः ई तक सार्वजनिक सेवाय् ज्या याःगु अनुभवं खारे जूपिं व्यक्तिपिंसं राजनीतिक दलया दवावय् निर्णय याइ धइगु खँ गलत जूगु खँ नं धयादीगु दु ।

वय्कलं सर्वोच्च अदालतय् संसद विघटन सम्बन्धी मुद्दा न्ह्यानाच्वंगु खःसां नं निर्वाचन आयोगं धाःसा निर्वाचन यायेगु निंतिं थःगु तयारी न्ह्याके फइगु खँ नं धयादीगु दु ।

वय्कलं धयादी, ‘निर्वाचन आयोगयात गुगुं नं दलं निर्वाचनया तयारी दिकि धकाः धायेगु अधिकार मदु, निर्वाचन यायेगु निंतिं आयोगया आपालं ज्या दयेफु, प्रक्रिया हे दिके धायेगु पाय्छि जुइमखु, थुकथं धायेगु नं गलत हे जुइ ।’

पुलांम्ह आयुक्त श्रेष्ठं सतकय् छु जुयाच्वन धकाः स्वयेगु मखुसे ऐन नियम कानुनयात स्वयेगु खः धासें तर दल दर्ताया विषय धाःसा थाकुइगु खँ धयादीगु दु । वय्कलं नेपाःया राजनीतिक पार्टीतय्के राजनीतिक संस्कार विकास जुइ मफुगुलिं समस्या ब्वलंगु धासें धयादी, ‘राजनीतिक दलतय् दुने शक्ति हस्तान्तरण यायेगु, न्हू पुस्तायात थाय् बीगु खँ गौण जुल, थुकिं लोकतन्त्रया विकासय् पंगः थंगु दु, उकिया हे कारणं राजनैतिक संस्कार विकास जुइ मफुत ।’

थ्व स्वयां न्ह्यः निर्वाचन प्रक्रिया न्ह्याकेगु बारे सहलह यायेगु झ्वलय् नेकपा प्रचण्ड–नेपाल तत्काल निर्वाचन जुइगु सम्भावना मदु धासें निर्वाचन प्रक्रिया दिकेमाःगु खँ धाःगु खः ।