चिकित्सक संघयात येँ महानगरपाखें द्वःछिपाः ज्याकेट ग्वाहालि

येँ – चिकित्सक संघयात येँ महानगरपालिका पाखें द्वःछिपाः ज्याकेट ग्वाहालि बिउगु दु । ज्यान जाेखिमय् तयाः ज्या यानाच्वंपिं चिकित्सकतय् नीति थ्व ज्याकेट बिउगु खः ।

येँ महानगरपालिकाया प्रमुुख बिद्यासुन्दर शाक्यं नेपाल मेडिकल काउन्सीलया अध्यक्ष डाक्टर भगवान कोइराला व नेपाल चिकित्सक संघका अध्यक्ष डाक्टर लोचन कार्कीयात मंंकाः कथं राष्ट्रियसभागृहय् ज्याकेट हस्तान्तरण यासें प्रमुख शाक्यं काेभिड थेंज्याःगु अदृष्य शत्रुलिसेया लडाईँलय् ज्यान जोखिमय् तयाः संक्रमितया उपचारय् निरन्तर खटे जुयाच्वंपिं चिकित्सकतय्त ग्वाहालि यायेदयाः लय्ताः धयादिल ।

‘न्हियान्हिथं संक्रमण अप्वयाच्वंगु दु, थज्याःगु अवस्थाय् मनाेबल उच्च यानाः ज्यान जाेखिमय् तयाः अग्रिम माेर्चाय् च्वनाः उपचारय् खटे जुयाच्वंपिं चिकित्सकतय्त फुक्क थासं ग्वाहालि जुइमाः,’ वय्कलं धयादिल । वय्कलं लिपा नं थज्यागु ग्वाहालि यायेत मनपा तयार दुगु खँ नं धयादीगु दु ।

नेपाल चिकित्सक संघया अध्यक्ष डाक्टर कार्कीं येँ महानगरपालिकाया सहयोगं थःपिं उत्साहित जूगु खँ धयादिल ।

‘थाैंकन्हय कार्यक्षेत्रय् खटे जुयाच्वंपिं चिकित्समतय्सं ल्हाः नयेमालाच्वंगु अवस्थाय् मनाेबल कमजाेर जुयाच्वंपिं चिकित्सकतय्त मनपाया थ्व ग्वाहालिं छुं हद तक मनाेबल थकायेत ग्वाहालि जुइगु आशा याना ।,’ संघया अध्यक्ष कार्कीं धयादिल ।

ज्याझ्वः संघया दुजः डा. मनाेजमान श्रेष्ठया संयाेजनय् जूगु खः ।