ब्याज पीडित जनताया संघर्ष समिति
येँ – भुखाय् पीडित जनतां भूकम्प पीडित संघर्ष समिति नीस्वंगु दु । थीथी बैंकय् त्यासा कयातःपिं जनताया शनिवाः जूगु भेलां संघर्ष समिति नीस्वंगु खः । यलया यज्ञरत्न वज्राचार्यया अध्यक्षताय् नीस्वंगु समितिइ उपाध्यक्ष सुदीप खड्का, सचिव योगेन्द्र कपाली, कोषाध्यक्ष विगेन तुलाधर च्वनादीगु दु ।
अथेहे दुजलय् महेन्द्रप्रसाद वाग्ले, शम्भुलाल श्रेष्ठ, सानुमैयाँ महर्जन, शोभा सिं, सन्तोष गजुरेल, सुरेश थापा व हरिप्रसाद श्रेष्ठ च्वनादीगु दु । म्हिगः जूगु भेलाय् छुं न्हिं न्ह्यः भुखाय् पीडित जनतां कयातयागु त्यासाया साँवा ब्याज मपुलेगु घोषणा नं याःगु दु । सरकारं भुखाय् पीडित जनतायात न्यादँनिसें झिदँया निंतिं २ प्रतिशत ब्याजदरं त्यासा बिया वयाच्वंगु खःसा वाफिया ऐन वयेधुंकाः पुनर्कर्जाया ई निदँ जक धायेवं भुखाय् पीडित जनता मारय् लाःगु खः ।
सरकारं पुनर्कर्जा निदँ लिपा नवीकरण मयायेगु धकाः थीथी वाणिज्य बैंकयात मौखिक रुपं निर्देशन बिउगु खःसा भुखाय् पीडित जनतां थःपिंसं बैंक दर सरह ब्याज पुले फइ मखु धकाः आन्दोलन यानाच्वंगु खः । मेखे सरकारं भुखाय् पीडित जनताया निंतिं न्हूगु हे नियमावली हयेगु तयारी यानाच्वंगु खँ सूत्रं धाःगु दु ।
सूत्रंया कथं आः हयेत्यंगु नियमावलीइ भुखाय् पीडित जनताया निंतिं न्यादँ निसें न्हय्दँ तकया पुनर्कर्जा बीगु कथं तयारी दु । पुनर्कर्जा व्यवस्थापन यायेगु निंतिं सरकारं ५ अर्ब तकाया पुनर्कर्जा बिस्कं व्यवस्था यायेधुंकूगु खँ नं राष्ट्र बैंकं स्रोतं धाःगु दु ।
तर भुखाचं पीडित जनतां धाःसा थःपिंत न्हापा सरकारं घोषणा याः थें झिदँया ई माः धकाः माग यानाच्वंगु दु । सरकारं न्हय्दँया निंतिं यदि पुर्नर्कर्जा बिल धाःसां नं थःपिंसं बैंकया साँवा व ब्याज पुलेफइगु अवस्था मदु धासें पीडित जनतां उगु माग याना वयाच्वंगु खः ।
LEAVE YOUR COMMENTS