
येँ (नेपालभाषा टाइम्स)÷नेवाः देय् दबूया न्हापांगु राष्ट्रिय परिषदया मुँज्या वंगु शनिवाः जुल । थगुने धरानय् जूगु देय् दबूया न्हय्क्वःगु तःमुँज्यां न्हूगु नेतृत्व ल्ययेधुंकाः विधानकथं गठन जूगु राष्ट्रिय परिषद्या मुँज्या न्हापांखुसी च्वंगु खः ।
देय् दबूया संरक्षकनापं नेवाः न्ह्यलुवा मल्ल के. सुन्दरं भिंतुना न्वचु बियादिसें देय् दबूया ज्याझ्वलय् राजनीतिक पृष्ठभूमिया व्यक्तित्वपिनिगु उपस्थिति छाय् जुल धइगु न्ह्यसः थनादिसें हिया स्वापू समुद्रया लः स्वयां नं ख्वातुइगु जक मखु, समुद्रया जाः स्वयां नं तजाः जुइ धयादिल ।
ज्याझ्वलय् मूपाहां, पाहांकथं झायाच्वनादीपिं मन्त्रीलिसें संघ व प्रदेशय् प्रतिनिधित्व यानाच्वनादीपिं सांसदतय्त थःपिं छिकपिनि मतदाता नं मखु, कार्यकर्ता नं मखु, पार्टीलिसे छुं नं स्वापू मदु अय्नं छिकपिं देय् दबूया ज्याझ्वलय् छाय् धइगु न्ह्यसः तयादिसें थुकिया छगू हे जक लिसः धइगु नेवाः मांया क्वखं बुइकातःपिं सन्तानलिसेया स्वापू खः धयादिल ।
वय्कलं देय् दबू व नेताया सम्बन्ध स्वयां नं नेवाः जातिया भावनात्मक स्वापूया कारणं हे थौं झी सकलें छगू हे दबुलिइ दनाच्वनागु खः धयादिल ।
प्रतिनिधि सभाया नेतृत्व यासें येँ ८ नं क्षेत्रया सांसद विराजभक्त श्रेष्ठं देय् दबूयात माःगु ग्वाहालि यायेत थः प्रतिवद्ध दु धयादिल । वय्कलं थः छम्ह सांसदया ल्याखं जक मखु नेवाः जूगु नातां नेवाः नुगः ब्वयाः देय् दबूयात माःगु इलय् माःकथं ग्वाहालि यायेत तयार दु धयादिल ।
देय् दबूया सल्लाहकारलिसें येँ ९ नं. क्षेत्रया प्रतिनिधिसभा सदस्य कृष्णगोपाल श्रेष्ठं पार्टीया कार्यकर्ताया सम्बन्ध व भावना अलग अले नेवाःया भावना अलग जुइ धासें पार्टीलिसेया सम्बन्ध छखे तयाःछम्ह नेवाःया ल्याखं न्ह्याथेंज्याःगु अवस्थाय् नं थः नेवाः समुदायया निंतिं समर्पित जुयाः
न्ह्यज्यायेगु जुइ धयादिल ।
सांसद श्रेष्ठं नेवाःतय् भाषा, जाति, पहिचानया मुद्दा व राजनीतिक अधिकार प्राप्तिया आन्दोलनया झ्वलय् आः नेवाःतय्सं तत्कालीन, मध्यकालीन व दीर्घकालीन रुपं यायेमाःगु ज्याया वर्गीकरण यानाः वनेगु स्वयेमाः धयादिल ।
देय् दबूया मेम्ह सल्लाहकारलिसें पुलांम्ह महान्यायाधिवक्ता मुक्ति प्रधानं राजनीतिइ दुपिं नेवाःत अधिकार प्राप्ति आन्दोलनय् मदुगु व अधिकार प्राप्तिया आन्दोलनय् लगे जुयाच्वंपिंसं राजनीति याये ययेकाच्वंगु मदु धासें आः राजनीति व अधिकार प्राप्ति आन्दोनयात नापनापं न्ह्यःने यंकेमाःगु स्थिति वःगु दु धयादिल ।
ज्याझ्वलय् मूपाहांकथं झायादीम्ह कानून, न्याय तथा संसदीय मामिला मन्त्री धु्रवबहादुर प्रधानं देय् दबुलिइ वयेगु न्हापांनिसें मं दुगु खःसां नं वये मखनाच्वंगु खँ कनादिसें थौं ह्वःताः चूलाःगु खँय् लसता प्वंकादिल ।
देय् दबूया थःगु गृह जिल्लाया संरक्षक नं जुयाच्वनादीम्ह वय्कलं नेवाःत गबलें नं याकःचा जुइमखु, न्ह्याबलें नं छप्पँ जुयाच्वनी धइगुया दसि थः नेवाःतय् हे भोटं निर्वाचित जूगु खँ कनादिल । लिसें वय्कलं थःगु हे समुदायया राष्ट्रिय संगठनपाखें सम्मानित जुइ खंगुलिं नं वय्कलं लसता प्वंकादिसें थम्हं गबलें नं नेवाःतय्सं छ्यं क्वःछुकेमालीगु ज्या मयायेगु प्रतिवद्धता प्वंकादिल ।
ज्याझ्वलय् नेपाल सरकारया संघीय मन्त्रीलिसें प्रतिनिधिसभा व प्रदेशसभाय् प्रतिनिधित्व यानादीपिं नेवाः सांसदतय्त हनेज्या नं याःगु खः । ज्याझ्वलय् सकलें सांसदतय्त नेवाः परम्पराकथं ख्यें सगं बियाः, मिजं सांसदतय्त बेतालि व मिसा सांसदतय्त दोसल्ला न्ययेकाः हनेज्या याःगु खः ।
देय् दबूया नायः पवित्र वज्राचार्यया सभापतित्वय् वरिष्ठ न्वकु चन्द्रलाल राजभण्डारीं लसकुस यानादीग ज्याझ्वलय् सांसद सुशीला श्रेष्ठ, देय् दबूया सल्लाहकारलिसें राष्ट्रिय योजना आयोगया दुजः प्रा. डा. गीताभक्त जोशीं नं नुगःखँ तयादीगु खः ।
ज्याझ्वःया निगूगु सत्रय् देय् दबूया दांभरिं निरञ्जनरत्न शाक्यं आर्थिक, मूछ्याञ्जे सत्यनारायण डंगोलं सांगठनिक व नायः वज्राचार्यं प्रगति विवरण न्ह्यब्वयादीगु खःसा उकियात थीथी पुचलय ब्वथलाः सहलह ब्याकूगु खः ।
प्रतिवेदनयात कयाः समूहगत रुपं जूगु सहलह लिपा देय् दबूया न्वकुपिं उमेश स्थापित, हरिकुमार श्रेष्ठ, कमल श्रेष्ठ, परिषदया दुजः उदेन न्हूसाय्मिपिंसं न्ह्यसः तयादीगु खः ।
उगु हे ज्याझ्वलय् भाषाह्यमि भुवनराज मानन्धर (कालिमाति)पाखें न्यागू लख, नायः वज्राचार्य, न्वकु रश्मिला प्रजापति व नेवाः मिसा दबूपाखें नेवाः देय् दबूयात छगू छगू लख आर्थिक ग्वाहालि लःल्हाःगु खः ।
LEAVE YOUR COMMENTS