समाजवादी नेवाः संघया संरक्षक व सल्लाहकार घोषणा

येँ (नेपालभाषा टाइम्स)÷ नेपाल समाजवादी नेवाः संघं थःपिनि संरक्षक व सल्लाहकार घोषणा याःगु दु । मंगलवाः नेपाल समाजवदी पार्टीया अध्यक्ष डा. बाबुराम भट्टराईया प्रमुख आतिथ्यताय् जूगु छगू ज्याझ्वःया दथुइ संघया संरक्षक व सल्लाहकार पुचःया घोषणा याःगु खः ।

मुँज्यां बागमति प्रदेशया आन्तरिक मामिला तथा कानून मन्त्री गंगानारायण श्रेष्ठ, हिसिला यमि, अनुप सिं सुवाल, भीम महर्जन, श्रीराम खाइजु व सुरेश खड्गीयात संघया संरक्षक व चिरिकः शोभा ताम्राकार, डा. ज्ञानेन्द्ररत्न तुलाधर, मदन महर्जन, नहेन्द्र प्रधान व मञ्जु श्रेष्ठयात नेपालमण्डल लागाया सल्लाहकार घोषणा याःगु खः ।

ज्याझ्वलय् संरक्षक अनुप सिं सुवालं प्रादेशिक भाषा ऐन दयेकेत ३ नम्बर प्रदेशया आन्तरिक मामिला व कानून मन्त्री श्रेष्ठं म्हितादीगु भूमिकायात च्वछासें भाषा ऐन विधेयक दयेकेत व उकियात लागू यायेत माःकथं प्रदेश सरकारयात ग्वाहालि यायेत थःपिं तयार दु धयादिल । ३ नं प्रदेशया नां नेवाः ताम्सालिङ प्रदेश तयेत संघं विभागीय मन्त्रीयात ज्ञापन पौ तकं बियागु जानकारी बिसें वय्कलं नेवाः स्वायत्त राज्य नीस्वनेत थःपिंलिसे मुद्दा ज्वःलाःगु मेमेगु शक्तिलिसे सहकार्य यानाः आन्दोलन यायेगु तयारी जुयाच्वंगु नं कनादिल ।

बगमति प्रदेशया मन्त्री श्रेष्ठं प्रादेशिक भाषा ऐन प्रदेशसभां पारित यानाः प्रदेशया सरकारी कामकाजी भाषाकथं नेवाः व तामाङ भाय् छ्यलेगु प्रतिबद्धता प्वंकादिसें संघं माग यानाच्वंगु मातृभाषायात माध्यमभाषाकथं १२ गू तगिंतक ब्वंकेगु व उकिया निंतिं ज्या न्ह्याकाच्वनागु जानकारी बियादिल । नेवाः प्रदेश पलिस्था यायेत व ३ नं. प्रदेशयात ‘नेवाः ताम्सालिङ’ नामाकरण यायेत थःपिंसं नं घ्वानाच्वनेगु जुइ धयादिल ।

मूपाहां डा. भट्टराईं जारी संविधान आदिवासी जनजातिया अधिकारया ल्याखं अपूर्ण जूगुलिं संघर्ष जारी हे दुगु धासें देय्या द्रुत विकास व संघीयता रक्षाया लागिं संविधानसभाया उच्चस्तरीय आयोगं सिफारिस याःगु १० जोड १ प्रदेशया विकल्प मदुगुलिं धयादिल । उकियात हे स्थापित यायेमाःगु खँय् बः बियादिसें वय्कलं पृथ्वीनाराण शाहया गोरखा राज्यया विस्तारं पीडित नेवाःत थःगु मुक्तिया लागिं न्ह्याबलें सचेत व आन्दोलित जुयाच्वनेमाः धयादिल ।

संघया केन्द्रीय नायः माधव श्रेष्ठया सभापतित्वय् न्ह्याःगु ज्याझ्वलय् चिरिकः शोभा ताम्राकार, भीम महर्जन, मदन महर्जन, सतेन्द्रकाजी श्रेष्ठ,
मूछ्याञ्जे दिलिप शाही व न्वकु न्हुच्छेशोभां नं नेवाः आन्दोलन व पहिचानया सन्दर्भय् थःथःगु बिचाः प्वंकादीगु खः । संघया सदस्यता वितरण नं याःगु उगु ज्याझ्वः संघया न्वकु राकेश मास्कें न्ह्याकादीगु खः ।