पं. निष्ठानन्दया १६५ दँ बुन्हि न्यायेकल

येँ- गद्यगुरु पं. निष्ठानन्द वज्राचार्यया १६५ दँ बुन्हि म्हिगः न्यायेकल । निष्ठानन्द स्मृति गुथिपाखें म्हिगः नःबहिली वय्कःया झ्वाता न्ह्यःने लुमंति मुँज्या याःगु खः । ज्याझ्वलय् विज्ञपिं काशिनाथ तमोट, सुवर्ण शाक्य व पवित्र वज्राचार्यपिंसं पं. वज्राचार्यया जीवनया थीथी पक्षयात कयाः नुगःखँ प्वंकादीगु खः । लिसें अन उपस्थित भाषाह्यमिपिंसं पण्डित वज्राचार्यया झ्वाताय् स्वां नं देछाःगु खः ।

राणा शासनया निरंकुशकालय् अस्तित्व हे लोप थें जुइत्यंगु नेपालभाषायात हानं म्वाकेगु ज्याय् तःधंगु योगदान बियादीम्ह पं. वज्राचार्ययात नेपालभाषा ख्यःया प्यंगःथां मध्ये छगः कथं कयातःगु दु । वय्कलं ‘नेपालभाषा गथे न्ववायेगु खः अथे हे च्वयेगु खः’ धइगु मान्यता विकास यानादीगु खः । वय्कलं थम्हं हे दयेकूगु सिँयागु प्रिन्टिङ प्रेसं छापे यानाः पिथनादीगु नेपालभाषाया प्रज्ञापारमिताया एकविंशति श्लोक’ सफूचायात नेपाःया हे न्हापांगु छापा आखलं पिहां वःगु सफू माने याइ ।