जगतसुन्दर ब्वनेकुथिइ बौद्ध वक्तृत्वकला पर्व

येँ (नेपालभाषा टाइम्स)-जगतसुन्दर ब्वनेकुथि परियत्ति केन्द्रया ग्वसालय् वंगु शनिवाः बौद्ध वक्तृत्वकला पर्व जुल । नेपालमण्डलव्यापी बौद्ध वक्तृत्वकला पर्व मूगुथिया इनापय् केन्द्रया ग्वसालय् नीगुक्वःगु नेपालमण्डलव्यापी बौद्ध वक्तृत्वकला पर्व जूगु खः ।

केन्द्रया केन्द्राध्यक्ष माया मानन्धरया सभापतित्वय् जूगु ज्याझ्वलय् श्रद्धेय भिक्षु कोण्डन्य महास्थविर मूपाहांकथं बिज्याःगु खः । येँ महानगरपालिकाया पुलांम्ह प्रमुख विद्यासुन्दर शाक्य विशेष पाहांकथं झायादीगु ज्याझ्वलय् वक्तृत्वकला पर्व मू गुथिया नायः विसन्तर शाक्य, मू गुथिया सल्लाहकार बौद्ध विद्वान डा. गौतमवीर वज्राचार्य, निवर्तमान नायः पूर्णराज शाक्य, मू गुथिया मूछ्याञ्जे मदनबहादुर तुलाधर, पुलांम्ह नायः देवेन्द्र वज्राचार्य, ब्वनेकुथि संचालक समितिया नायः डा. चुन्दा वज्राचार्य पाहांकथं झायादीगु खः ।

मूपाहां भिक्षु कोण्डन्य महास्थविरपाखें त्वाःदेवाय् मत च्याकाः पंचशील बियाबिज्यासे न्ह्याःगु ज्याझ्वलय् परियत्ति केन्द्रया नायः लोककवि राजभाई जकःमिं लसकुस यानादीगु खः ।

थीथी परियत्ति केन्द्र, विहार, पुस्तकालय यानाः झिंछम्हेसिनं ब्वति काःगु ज्याझ्वलय् पारमी शाक्य (दीपावति पुस्तकाल) न्हाप, प्रतिस्था शाक्य (धम्म साकच्छा) लिउ, सलोनाी शाक्य (श्री शाक्यसिंह विहार तथा परियत्ति केन्द्र) लियांलिउ व मतिना मानन्धर (युवा बौद्ध समूह) हःपाः सिरपाः त्याकेत ताःलाःगु खः ।

कासाय् न्हापयात न्यय्द्वःतका, लिउयात झिद्वः, लियांलिउयात न्हय्द्वः व हःपाःयात न्याद्वः तका दांलिसें दसिपौ व उपहार लःल्हाःगु खः । विजयी कासामिपिंत मूपाहांपाखें दसिपौ लःल्हानाबिज्याःगु खःसा विशेष पाहां शाक्यं उपहार व दातापाखें श्रीजेशलाल शिल्पकारं दां लःल्हानादीगु खः ।

थुगुसी न्हापांखुसी न्हापयात न्यय्द्वः तका दां सिरपाः लःल्हाःगु खःसा न्हाप, लिउ व लियांलिउ व हःपाः लाःम्हेसित मूगुथिपाखें दां सिरपाःया व्यवस्था याःगु खःसा ब्वति काःपिं सकसितं मोतिलाल शिल्पकार द्वःछि द्वःछि तका नगदया व्यवस्था यानादीगु खः । अथे हे कासाय् विजयी जुयादीपिंत उपहारया व्यवस्था मू गुथिया मूछ्याञ्जे तुलाधरं यानादीगु खः। कासाया निर्णायकय् डा. त्रिरत्न मानन्धर, रत्नसुन्दर शाक्य व डा. जुनु बासुकला च्वनादीगु खः ।

ज्याझ्वलय् मू पाहां भिक्षु कोण्डन्य, विशेष पाहां विद्यासुन्दर शाक्य, मूगुथिया नायः शाक्य लगायतं नुगःखँ तयादीगु खः । उगु हे ज्याझ्वलय् आकिवं ३० क्वःगु वक्तृत्वकला पर्वया ग्वसाः ग्वइगु दीपावति पुस्तकालय परियत्ति केन्द्रया नायः इन्द्रकुमारी शाक्ययात जगतसुन्दर परियत्ति केन्द्रया नायः माया मानन्धरं पाःब्व नं लःल्हानादीगु खः ।