ने. सं. ११४३ चौलाथ्व पारू -

नेपालभाषा पाठ्यक्रम पितब्वज्या

येँ – येँ महानगरपाकिाया दुनेया ब्वनेकुथिइ ब्वंकीगु नेपालभाषा विषयया पाठ्यक्रम तयार यानाः उकियात पितबीगु ज्या (प्रबोधिकरण) जुल । येँ महानगरपालिका नेपालभाषा पाठ्यक्रम निर्माण समिति शिक्षा विभागया ग्वसालय् छुं दिं न्ह्यः थनया जगतसुन्दर ब्वनेकुथिइ जूगु ज्याझ्वलय् उगु पाठ्यक्रम पित बीगु ज्याझ्वः जूगु खः ।

विद्यालय शिक्षाया अधिकार स्थानीय तहय् वयेधुंकूगु व स्थानीय तहं स्थानीय पाठ्यक्रम तयार यानाः अध्ययन याकेगु झ्वलय् येँ मनपाया विभागया ग्वसालय् उगु ज्याझ्वः जूगु खः । ज्याझ्वलय् तगिं छगूनिसें च्यागू तकया निंतिं नेपालभाषा विषयया ब्वनेज्वलं पाठ्यक्रम तयार यानाः पित बीगु ज्या जूगु खः ।

ज्याझ्वलय् नेपालभाषा केन्द्रीय विभागया प्रा. डा. ओमकारेश्वर श्रेष्ठ, संस्कृतिविद् डा. चुन्दा वज्राचार्य, नेवाः स्यनामि दबू नेपालमण्डलया न्वकू कृष्णभक्त मानन्धर लगायतं नुगःखँ तयादीगु खः ।

नेपालभाषा पाठ्यक्रमय् भाषा, लिपि, कला, साहित्य, संस्कृति, रीतिथिति, व्यक्तित्व म्हसीका, नखःचखः, थाय्बाय्, नेवाः गतिविधिलगायत आपालं विषययात कःघाना स्यनामि दबूया मानन्धरं ‘नेपालभाषा टाइम्स’ यात जानकारी बियादिल ।

लिसें वय्कलं पाठ्यक्रम तयार यायेगु ज्या जुइधुंकाः आः व हे कथं अध्यापनया निंतिं शिक्षक दरबन्दीया व्यवस्था नं याकनं माःगु खँय् सरोकारवालाया ध्यानाकर्षण नं यानादिल ।