ने. सं. ११४३ चौलाथ्व पारू -

धिमे व पंचबुद्ध प्याखं प्रशिक्षण

येँ(नेपालभाषा टाइम्स)- नेवाः खलः कास्कीया कचा संगठन नेवाः मिसा पुचः कास्की व नेवाः ल्याय्म्ह पुचः कास्कीया ग्वसालय् जूगु धिमे व पंचबुद्ध प्याखं प्रशिक्षण क्वचाःगु दु । नेवाः खलः कास्कीया संयोजनय् जूगु प्रशिक्षणय् धिमे बाजनय् ख्वीन्याम्ह व पंचबुद्ध प्याखं प्रशिक्षणय् नीन्याम्हेसिनं ब्वति कयादीगु खः ।

तालिम समापन ज्याझ्वलय् मूपाहांकथं झायादीम्ह गण्डकी प्रदेशया मुख्यमन्त्री खगराज अधिकारीं प्रशिक्षार्थीतय्त दसिपौ लःल्हानादीगु खः । पोखरा महानगरपालिका ३ वडाया आथिंक ग्वाहालिं जूगु तालिमया निंतिं ९ वडापाखें च्यागः धिमे बाजं खलःयात ग्वाहालिकथं लःल्हाःगु खः । तालिम येँया वज्र कला कुञ्जया सुदन मुनिकारं बियादीगु खः ।

खलःया नायः अशोक पालिखें थःपिं खँ ल्हाइपिं जक मखु, ज्या यानाः क्यनीपिं खः धइगु छगू दसु थ्व तालिम खः धासें थुकथं थःगु कार्य क्षेत्रय् नं न्ह्यचिलाः नेवाः संस्कृतियात ल्यंका तयेगु उद्देश्यं हे खलःपाखें न्हू पुस्तायात लक्षित यानाः थीथी तालिम संचालन याना वयाच्वनागु जानकारी बियादिल । वय्कलं नेवाः संस्कृतियात ल्यंकेगु उद्देश्यं थुकथंया प्रशिक्षण ज्याझ्वः ग्वसाः ग्वयागु व वइगु दिनय् नं निरन्तर रुपं न्ह्याका यंकेगु जुइ धयादिल ।

मिसा पुचःया संस्थापक नायः शान्ति श्रेष्ठ उदासं ल्याय्म्ह पुस्तातय् संस्कृतिप्रति मोह दयाच्वनेमा नापं अझ न्ह्यःने यंकेमा फयेमा धइगु उद्देश्यं हे भाषा, कला, संस्कृति, नखःचखः आदिया बारे जानकारी बीगु ल्याखं ज्याझ्वः याना वयाच्वनागु जानकारी बियादिल ।

उगु इलय् प्रशिक्षार्थीतय्सं धिमे बाजंलिसें पंचबुद्ध प्याखंया प्रस्तुति नं न्ह्यब्वःगु खः ।