अभिलेखालय चीकेत सर्वोच्चया पौ

येँ – यँे महानगरपालिकाया भवन ऐतिहासिक महत्व दुगु सम्पदा जूगुलिं थुने दइ मखु धकाः आदेश बिउम्ह सर्वोच्च अदालतं देय्या सम्पूर्ण ऐतिहासिक दस्तावेज कःघानाच्वंगु राष्ट्रिय अभिलेखालययात धाःसा थाय् त्वःताः छेँ खाली या धकाः दँय्दसं पौ च्वयाः ख्याच्वः बियाच्वंगु खँ सीदुगु दु ।

सर्वोच्चया थ्व पौया कारणं अभिलेखायय् तयातःगु द्वलंद्वःदँ पुलांगु ऐतिहासिक दस्तावेजत नष्ट जुइगु चिन्ता जुयाच्वंगु दु । वि.सं. २०७१ वैशाख २५ गते सरकारं सिंहदरबार परिसरय् च्वंगु राष्ट्रिय अभिलेखालय व पुरातत्व विभाग दुगु छेँ सर्वोच्च अदालतयात बीगु निर्णय याःगु खः । वयां लिपा सर्वोच्चं दँय्दसं पौ च्वयाः छेँ खाली या धकाः पुरातत्वयात ख्याच्वः बीगु शुरु याना हःगु खः ।

पुरातत्व धाःसा थनं दनाः गन वनेगु खः ठेगान मदुनि । थ्व छेँ वि.सं २०१८ य् भारत सरकारया ग्वाहालिइ नेपाःया ऐति– हासिक, पुरातात्विक, सांस्कृतिक महत्वया सामग्री संरक्षण जुइमा धकाः दयेकूगु खः । अभिलेख संरक्षण यायेत वातानुकूलित रुपं दयेकूगु थ्व भवनं मेथाय् सामग्री सारे यायेबलय् भ्वं नष्ट जुइगु जुयाः थुकी पुनर्विचार यायेत सरकारयात इनाप याना वयाच्वंगु दु ।

अनया सामग्री मेथाय् सारे यात धाःसा अन च्वंगु २५ प्रतिशत स्वयां अप्वः सामग्री नष्ट जुइगु खँ अभिलेखालयया प्रमुख शोैभाग्य प्रधानांगं कनादीगु दु । इतिहासविद् महेशराज पन्तं अभिलेख संग्रह यायेगु हे प्रयोजनया लागि दयेकूगु भवन मेथाय् सारे याये मजिउ, बरु माःसा सर्वोच्च अदालत हे मेथाय् सारे यायेमाः धयादीगु दु ।

सम्बन्धित बुखँ

LEAVE YOUR COMMENTS