ने. सं. ११४३ तछलाथ्व द्वादशी -

सानफ्रान्सिस्कोय् यःमरि मय्जुया सांस्कृतिक ज्याझ्वः

येँ- अमेरिकाया क्यालिफोर्निया राज्यया सानफ्रान्सिस्को सहरय् यःमरि मय्जु सांस्कृतिक ज्याझ्वः जुल । यति रेष्टुरेण्टय् जूगु ज्याझ्वलय् नेपाःया नसाज्वलंया बिस्कं म्हसीका व महत्व दुगु यःमरिया इतिहास, यःमरि दयेकेगु विधि, यःमरिया सांस्कृतिक व सामाजिक महतवलिसें नेवाः नसाज्वलनय् दइगु पंचतत्वया महत्वया बारे जानकारी बिउगु खः ।

यःमरि मय्जुया नायः अनुपा श्रेष्ठं थःगु कला, संस्कृति ल्यंका तयेगु उद्देश्यं अमेरिकाया थीथी सहरय् थुकथंया सांस्कृतिक ज्याझ्वः याना वयाच्वनागु जानकारी बियादिल ।

रेष्टुरेण्टया संचालक नारायण सोम्नामें नेपाःया थःगु हे मूल्य मान्यता दुगु संस्कृति, तिसा वसः ज्वलं, नसाज्वलंयात ल्यंका तयेत थुकथंया प्रचारात्मक ज्याझ्वःया आवश्यक दुगु खँ कुलादिल ।

यःमरि मय्जुया दुजः विनिशा श्रेष्ठं संस्कृति ल्यंकेमाः धकाः झी सकसिनं धयाच्वना, तर झीमध्ये अप्वःथें पाश्चात्य संस्कृतिया लिउलिउ जुयाः उकी हे थःत तंकावना च्वनागुलिइ झीगु संस्कृति नं ल्यनेमाः, रचनात्मक ज्या नं जुइमा नापं रोजगारीया ह्वःताः नं चूलायेमा धइगु ल्याखं थुकथंया ज्याझ्वः यानागु खः धयादिल ।

नेवाः समुदायया सभ्यता व संस्कृतिया छता विशेष प्रकारया परिकार जुयाच्वंगु व नेवाः समुदाय जक मखु, नेपाःमिया दथुइ हे तसकं लोकंह्वाःगु यःमरिया महत्वयात ब्यापकता बीगु ल्याखं थुकथंया ज्याझ्वःयात अभियानया रुपय् न्ह्यःने यंकूगु खः ।

नेपाःमिलिसें आपालं अमेरिकीतय् नं उपस्थिति दुगु ज्याझ्वलय् नेवाः भ्वय्या नं ग्वसाः ग्वःगु खःसा भ्वय्या व्यवस्थापन रेष्टरेण्टं याःगु खः ।