८० हजार किमि सतक निर्माण व सुधारया आवश्यक

येँ – देय्न्यंकं झण्डै ८० हजार किलोमिटर स्वयां अप्वः सतक निर्माण, स्तरोन्नति व सुधार यायेमाःगु आवश्यक जूगु खँ सीदुगु दु । तर, थुकिया जिम्मा सुनां कायेगु धइगु बारे छुं ठोस निर्णय जुइ फयाच्वंगु मदु ।देय् न्हूकथंया संघीय संरचनाय् वनेधुंकाः अज्याःगु सतकया जिम्मा सुनां कायेगु धइगु बारे छुं निर्णय जुइ मफयाच्वंगु खः ।

भौतिक पूर्वाधार तथा यातायात मन्त्रालयं छुं गज्याःगु सतकया जिम्मा सुनां कायेगु धइगु बारे आतक छुं नं निर्णय जुइ मफयाच्वंगु खँ धाःगु दु । न्हापा अप्वः थें सतकया जिम्मेवारी संघं हे कयातःगु जूसां आः न्हूकथं संघीय संरचनाय् वने धुंकाः सतक निर्माण, सुधार, स्तरोन्नति, मर्मत लगायतया ज्या प्रदेश व स्थानीय तहं यायेमाःगु मन्त्रालयया जिकिर दु ।

सरकारं गज्याःगु सतक सुनां निर्माण यायेगु धइगु खँ क्वःछीगु निंतिं सहलह धाःसा शुरु याःगु दु । मन्त्रालयया प्रवक्ता शिवहरी सापकोटाया कथं राष्ट्रिय गौरवया आयोजना अन्तर्गतया सतक निर्माणया जिम्मा संघं हे काःगु दु ।

थगुनेनिसें सतकया निंतिं फ्यानातःगु बजेट प्रदेश सरकारय् वने धुंकूगु मन्त्रालयं स्पष्ट याःगु दु ।वंगु पुस ३ गते च्वंगु अन्तर प्रदेश परिषद्या बैठकं संघं ठेक्का सम्झौता याःगु राष्ट्रिय गौरवया आयोजना प्रदेश सरकारयात लःल्हायेगु निर्णय याःगु खः ।