ने. सं. ११४४ ञलाथ्व नवमी -

म्याग्दीइ जोगी प्याखं प्रदर्शन

येँ(नेपालभाषा टाइम्स)- बेनीया सांस्कृतिक पहिचानया रुपय् दयाच्वंगु जोगी प्याखं प्रदर्शन याःगु दु । नेपालभाषा मंकाः खलः अन्तर्गतया ल्याय्म्ह पुचःया ग्वसालय् म्याग्दीया सदरमुकाम बेनी बजाःलिसें मङ्गलाघाट बजारय् वंगु शुक्रवाः न्हिछियंकं जोगी प्याखं क्यंगु खः ।

बेनीया हे सांस्कृतिक पहिचान जुयाच्वंगु जोगी प्याखं लछियंकं न्ह्याइगु थीथी प्याखं अन्तर्गत शुक्रवाः जोगी प्याखं क्यंगु खः । प्याखं क्यनेगु निंतिं नीस्वनातःगु जोगी नाच प्रदर्शन समितिया नायः सुशीलकुमार श्रेष्ठं स्वीम्ह स्वयां अप्वः ल्यासेल्याय्म्हलिसें मस्त सहभागि जुयाः महाद्यः, पार्वती लिसें थीथी देव देवीया भेषय् परम्परागत जोगी प्याखं क्यनेगु याना वयाच्वनागु जानकारी बियादीगु दु । लिसें वय्कलं थुगुसी न्हूपिं कलाकारतय्त नं तालिम बियाः प्याखनय् सहभागि याकागु खँ कनादिल । नेपालभाषा मंकाः खलः बेनीया नायः राजेन्द्रकुमार श्रेष्ठयाकथं जोगी प्याखं क्यने न्ह्यः द्यः लय्तायेकेकथं स्थानीय लक्ष्मीनारायण द्यः परिसरय् महाद्यः व पार्वतीया पुजा यायेगु चलन दया वयाच्वंगु दु । थथे द्यः लय् तायेकेत पुजा याइगु इलय् ताण्डव प्याखं क्यनेगु व जोगी दयेकाः बजारय् प्याखं क्यनेगु चलन दुगु वय्कलं कनादिल ।

थुकथं प्याखं क्यनेगु इलय् छेँखापतिं वनाः भिक्षाकथं ग्वाहालि मुनेगु चलन दुसा संकलन जूगु ग्वाहालि बर्षे प्याखंया व्यवस्थापन व संरक्षणय् खर्च यायेगु याना वयाच्वंगु दु । बेनीइ बजाः च्वंगु इलंनिसें थ्व प्याखं क्यनेगु याना वयाच्वंगु वय्कःया धापू दु । खलः अन्तर्गतया ल्याय्म्ह पुचःया नायः जेनेश श्रेष्ठं थुगुसी बर्षे प्याखं अन्तर्गत लाखे प्याखं, सल प्याखं, जोगी प्याखं, नागनागिनी प्याखंलिसें श्रीकृष्णया रथ जात्रा नं पिथनेगु ज्या जूगु जानकारी बियादिल ।