छितः नं वल ला सट्टबाजी एजेण्ट जुइत अनलाइन अफर ?
दिलिप शाहीपाखें
येँ- हेल्लो, जि हङकङं । छितः नापलायेखनाः लय्ता वल । जिगु नां शाइलिङ छि गनं ? जिं न्यने फइला छि ग्वःदँ दत ? अले छि नेपाःया गुगु जिल्लाय् ? छिं छु ज्या यानादिया ? छिगु आम्दानी गुलि दु ? उगु आम्दानीइ छि म्वायेफु ला ?
‘छिके ह्वाट्स एप दुला खँ ल्हायेगु नितिं ? जितः छिगु नम्बर छ्वया हयादिसँ, जि फेसबुकय् दइ मखु ।’
छम्ह विदेशी मिसाया फ्रेन्ड रिक्वेस्ट एसेप्ट यायेधुंकाः जितः वःगु मेसेज खः थ्व । वयां लिपा उम्ह मय्जुनाप ह्वाट्स एपय् खँल्हाबल्हा जुल ।
‘जिं स्वये छि नेपालय् तसकं लिमलाः थें च्वं । छिं छु ज्या यानादिया ? अले न्हिछिया ग्वःघौ ज्या यानादिया ?’
‘जि छम्ह पत्रकार खः, जिं न्हिं च्याघौ तक ज्या याना ।’
‘छिगु लछिया आम्दानी गुलि दु ?’
‘लछिया २ सय डलर ति दु ।’
‘छिं छाय् अप्वः ध्यबा वइगु ज्या मयायेगु ? अज्याःगु अप्वः ध्यबा वइगु ज्यां छितः पियाच्वंगु दु । छितः मेगु ज्या यायेगु मं दुला गुकिं छिं अप्वः आम्दानी यानादी फइ ?’
वयां लिपा छगू म्यासेज वइ– थ्व विश्वया फुटबल प्लेटफर्म खः गुकिं विश्वन्यंकं जू म्हितीपिंसं फाइदा याइ । उगु प्लेटफर्म आधिकारिक रुपय् नेपालय् लञ्च यायेत्यंगु दु । छाय्धाःसा प्लेटफर्म नेपालय् लोकंह्वाः व थ्वं सट्टेबाजी म्हितकाच्वंगु दु । व प्लेटफर्मं कल्याण स्कोरत सेट याइ । व नं १०० प्रतिशत लाभदायक जू ।
थौंकन्हय् थःत चीन वा हङकङया बासिन्दा धाइपिं मनूतय्सं आपालं नेपाःमिपिंत थज्याःगु मेसेज छ्वया हयाच्वंगु दु । अले उमिसं सट्टेबाजीया एजेन्ट जुइगु नितिं नेपाःमितय्त प्रलोभन नं बियाच्वंगु दु ।
होस यानादिसँ, थज्याःगु मेसेस छिकपिंत नं वयाच्वंगु दयेफु । तर सीकादिसँ, सट्टेबाजी नेपालय् गैरकानुनी खः । वंगु निलाया दुने सट्टबाजी याःगु द्वपनय् आपालं ल्याय्म्हतय्त प्रहरीं ज्वनेधुंकूगु दु । अले थज्याःगु सट्टेबाजी याइपिं अप्वः धइथें ल्याय्म्हत सुइदँ स्वयां क्वय्यापिं जुयाच्वंगु दु । उमिसं याकनं ध्यबा कमे यायेगु लोभय् थज्याःगु ज्या यानाच्वंगु दुसा लिच्वः स्वरुप प्रहरीया हिरासतय् च्वने मालाच्वंगु दु ।
LEAVE YOUR COMMENTS