मध्यपूर्वया युद्धं लुँया भावय् हानं न्हूगु कीर्तिमान
येँ (नेपालभाषा टाइम्स)- विश्वन्यंकं लुँया भावं न्हूगु रेकर्ड कायम याःगु दु । म्हिगः विश्वया लुँ वहः बजारय् लुँया भाः प्रतिऔंश २००६ डलर थ्यंगु दुसा नेपालय् तोलां १ लाख १७ हजार तका थ्यंगु दु । निरन्तर थथे भाः थहां वनाच्वंगु कारण धाःसा आः मध्यपूर्वय् न्ह्यानाच्वंगु इजरायल व प्यालेस्टाइन दथुया ल्वापु खः ।
नेपाल सुनचाँदी व्यवसायी महासंघया पुलांम्ह अध्यक्ष लिसें बजाः विश्लेषक तेजरत्न शाक्यं ‘नेपालभाषा टाइम्स’ यात कनादीकथं सन् २०२४ या शुरुवातय् विश्वय् लुँया भाः प्रतिऔंश २१०० डलर थ्यनीगु प्रक्षेपण यानातःगु खःसां थौंकन्हय् थहां वनाच्वंगु भाः स्वयेबलय् आः स्वन्ति तकया दुने हे २१०० डलर थ्यनीगु अनुमान याना हःगु दु ।
विश्व बजारय् थीथी बण्डया भाः कुहां वःगु कारणं यानाः कुहां वयाच्वंगु लुँया भाः आः बन्डया बजाः बांलाःसां नं थहां वनाच्वंगु खँ वय्कलं कनादिल । बन्डय् लगानी याइपिं नं आः वयाः लुँपाखे आकर्षित जुइवं लुँया भाः थहां वंगु खः ।
उकथं हे वंगु खुलाया दुने विश्वया थीथी केन्द्रीय बैंकतय्सं नं लुँ न्यायेगु क्रम अप्वयेका यंकेवं उकिया लिच्वः कथं नं लुँया भाः थहां वंगु खः । वय्कःया कथं वंगु खुलाया दुने जक थीथी देय्या केन्द्रीय बैंकतय्सं ३८७ टन लुँइ लगानी यायेधुंकूगु दु, गुकिया लिच्वः कथं लुँया भाः थहां वंगु खः ।
वय्कलं धयादिल, ‘विश्वया फुक्कं धइथें बैंकतय्सं नं थःगु लगानी सुरक्षित यायेत लुँइ लगानी यायेवं विश्व बजारय् लुँया भाः थहां वंगु खः । बैंकतय्सं लुँइ लगानी यायेवं हाकनं घ्यः लुइगु ज्या जूगु दु ।’ मेखे बजारय् लुँया भाः थहां वनाच्वंगु कारणं यानाः नेपाःया लुँ बजाः धाःसा सुनसान जुयाच्वंगु खँ नं वय्कलं कनादिल ।
नखः चखःया इलय् लुँ न्याये–मीगु ज्या जुइगु खःसां आः धाःसा बजाः हे सुनसान जुयाच्वंगु धासें वय्कलं धयादिल, ‘आः वइगु स्वन्तिइ छुं भचा व्यापार जुइला धकाः आशा यानाच्वंपिं व्यापारीत नं आः स्वन्तिया इलय् नं सुम्क च्वनेमाःगु अवस्था वइगु खनेदु ।’
LEAVE YOUR COMMENTS