लुँया भावय् न्हूगु कीर्तिमान

येँ (नेपालभाषा टाइम्स)- अमेरिकाया स्वंगू बैंक टाट पल्टे जुइवं अन्तर्राष्ट्रिय लुँया बजारय् न्हूगु रेकर्ड कायम जूगु दु । म्हिगः नेपाःया लुँवह बजारय् नं लुँया भावं न्हूगु रेकर्ड कायम यानाः तोलां १ लाख १० हजार तका कायम जूगु दु । उकथं हे वह तोलां १ हजार ३४५ तका कामय जूगु खः ।

अमेरिकाया बैंक टाट पल्टे जुइवं अनया शेयर मार्केट नं बांमलाक्क प्रभावित जुइवं लगानीकर्तातय्सं लुँइ लगानी अप्वयेकेवं लुँया भावं न्हूगु रेकर्ड कायम जूगु खँ नेपाल सुनचाँदी व्यवसायी महासंघया पुलांम्ह अध्यक्ष लिसें बजाः विश्लेषक तेजरत्न शाक्यं ‘नेपालभाषा टाइम्स’ यात कनादिल ।

वय्कःया कथं म्हिगः अन्तर्राष्ट्रिय बजारय् लुँ प्रतिऔश ११९० डलर कायम जूगु खः । म्हीग छन्हुं हे लुँ प्रतिऔंश ६९ डलर तक थहां वंगु खः । थ्व स्वयां न्ह्यः अन्तर्राष्ट्रिय बजारय् लुँ प्रतिऔश २ हजार डलर तक कायम जुइगु अनुमान यानातःगु खःसा आः व स्वयां नं थहां वनेफइगु अनुमान जुयाच्वंगु खँ नं बजार विश्लेषक शाक्यं कनादीगु दु ।
वय्कःया कथं स्वीट्जरल्याण्डया छगू प्रमुख बैंक स्वीस क्रेडिट बैंक संकटय् लायेवं लुँया भाः थहां वनेत थप बल बिउगु जानकारी नं बियादीगु दु । स्वीस क्रेडिट बैंक संकटय् लायेवं बैंकं स्वीस सरकारयाके ग्वाहालि फ्वंगु दु ।

अन्तर्राष्ट्रिय रुपं ब्वलंगु आर्थिक अस्थिरताया कारणं यानाः लुँया भाः थहां वंगु धासें वय्कलं धयादिल, ‘लगानीकर्तातय्सं लगानी याइगु थाय् धयागु रियल स्टेट व शेयर मार्केट खः, बैंकत डुबे जुइवं शेयर मार्केट नं डाँवाडोल जूगु दु, गुकिं यानाः लगानीकर्तात ‘सेफ हेभेन इन्भेष्टमेन्ट’ पाखे वनाच्वंगु दु । थुकिया लिच्वः लुँया बजारय् लाःगु खः ।’