काठमाडौं सुनचाँदीया सुरक्षा व कानून विषयय् अन्तक्र्रिया
येँ- काठमाडौं सुनचाँदी व्यवसायी संघया ग्वसालय् वंगु शनिवाः ‘शान्ति सुरक्षा व ऐन कानून’ सम्बन्धी छगू अन्तक्र्रिया ज्याझ्वः जुल । संघया ग्वसालय् लुँवहः व्यवसाय, व्वसायीतय्सं फयेमाःगु कानूनी झन्झट, चोरीजन्य समस्या लगायतया विषययात कयाः नेपाल प्रहरीलिसे उगु अन्तक्र्रिया ज्याझ्वः जूगु खः ।
सरकारं थनिं स्वदँ न्ह्यः हःगु मुलुकी देवानी संहिताय् लुँवह व्यवसायीतय्गु समस्या समाधान यायेकथं कानूनी व्यवस्था यानातःगु खःसां आःया इलय् उगु देवानी संहिताय् जुयाच्वंगु व्यवस्था अन्तर्गतया दफा, उपदफायात व्यवहारय् कार्यान्वयन यायेमाःगु आवश्यकतायात महसुस यानाः उगु अन्तक्र्रिया याःगु खः ।
अन्तक्र्रिया ज्याझ्वलय् संघया कानूनी सल्लाहकारलिसें वरिष्ठ अधिवक्ता ज्ञानरत्न शाक्यं लुँवहः व्यवसायी व प्रहरी प्रशासन दथुइ खने दयाच्वंगु अन्यौलताया कारण व उकिया समाधानया लँपुयात कयाः विस्तृत रुपं स्पष्ट यानादीगु खः ।
ज्याझ्वलय् पाहांकथं झायादीम्ह नेपाल सुनचाँदी व्यवसायी महासंघया वरिष्ठ सल्लाहकार तेजरत्न शाक्यं संघया स्थापना छु गुलि कारणं गुकथं जुल धइगु बारे स्पष्ट यानादीगु खः । अथे हे ज्याझ्वलय् विशिष्ट पाहांकथं झायादीम्ह महासंघया अध्यक्ष माणिकरत्न शाक्यं देय्न्यंकंया लुँवह व्यवसायीतय्सं फया वयाच्वंगु, फये मालाच्वंगु थीथीकथंया समस्या, कठिनाई, नापं व्यवसायीतय्त जुया वयाच्वंगु समस्याया समाधानया लँपुयात कयाः थःगु धारणा तयादीगु ख ः।
ज्याझ्वलय् मूपाहाकथं झायादीम्ह महानगरीय प्रहरी परिसर टेकुया प्रहरी वरिष्ठ उपरीक्षक अशोक सिंहं लुँवह व्यवसायीतय्त थःपिंसं अनावश्यक रुपं दुःख बीगु गुगुकथंया नं चाहना मखु धासें थःपिंसं कानूनया दायरां पिहां वनाः गबलें नं छुं नं ज्या यायेगु जुइमखु धयादिल ।
लिसें वय्कलं लुँवहया व्यवसायय् लगे जुयाच्वनादीपिंसं गबलें नं चोरी डकैटी, अवान्छित ज्या याइपिं वा यायेत स्वइपिं व्यक्ति वा समूहयात ग्वाहालि जुइकथंया ज्या मयायेत नं इनाप यानादिल । ‘नियम दुने च्वनाः ज्या याना च्वंक च्वंकं नं छुं कथंया समस्या वा कठिनाइ वल धाःसा व्यवसायी व प्रहरी दथुइ समन्वयात्मक भूमिका म्हिताः पूर्ण रुपं समर्थन यानाः ग्वाहालि यायेगु जुइ’ वय्कलं धयादिल । उगु इलय् प्रहरी वरिष्ठ उपरीक्षक सिंहं लुँवह व्यवसायीतय्सं न्यंगु थीथी न्ह्यसःया लिसः नं बियादीगु खः ।
संघया नायः सुरेश शाक्यया सभापतित्वय् जूगु ज्याझ्वलय् ज्याझ्वःया संयोजक उपेन्द्रकाजी शाक्यं सुभाय् देछानादीगु खः ।
LEAVE YOUR COMMENTS