चितवनतक पेट्रोलया पाइपलाइन हइगु

येँ – भारतं हइगु ग्यास व पेट्रोलियम पदार्थया पाइपलाइन आः चितवन तक हे हइगु जूगु दु । चितवन तक पाइपलाइन हयेत भारत तयार जूगु खँ धाःगु दु । वंगु शुक्रवाः उद्योग वाणिज्य तथा आपूर्ति मन्त्ती मातृका यादव व भारतया प्राकृतिक ग्यास तथा पेट्रोलियम मन्त्री धर्मेन्द्र प्रधान दथुइ जूगु सहलह लिपा चितवन तक हे पाइपलाइन हयेत सहमति याःगु खः ।

भारतीय पेट्रोलियम मन्त्री प्रधान भारतया मोतिहारी निसें अमलेखगंज तक पाइपलाइन हयेत जुयाच्वंगु ज्या स्वयेत शुक्रवाः नेपाः थ्यंकः झाःगु खः । थ्व झ्वलय् जूगु वार्ताय् मोतिहारी निसें चितवन तक हे पाइपलाइन हयेगु बारे सहलह जूगु खः । भारतीय आयल निगमं थ्वयां न्ह्यव हे चितवन तक पाइपलाइन बिस्तार यायेगु बारे प्रारम्भिक सर्वेक्षण यायेधुंकूगु खँ धाःगु दु ।

भारतीय आयल निगमं पेट्रोलियम पदार्थया पाइपलाइन चितवन तक हे हयेफइगु खँ धायेधुंकूगु दु । ग्यास हयेगु निंतिं धाःसा अध्ययन याये ल्यं दनिगु खँ धाःगु दु । थौंकन्हय् मोतिहारी अमलेखगंज तक पेट्रोलियम पदार्थ हयेगु निंतिं ७० किलामिटर पाइप लायेगु ज्या जुयाच्वंगु दु । थ्व ज्या वइगु न्याला दुने क्वचाइ धाःगु दु । थ्व हे पाइपलाइनयात विस्तार यानाः चितवन तक हयेगु सहमति निम्ह मन्त्रीतय् दथुइ जूगु खः ।

सम्बन्धित बुखँ

LEAVE YOUR COMMENTS