ने. सं. ११४६ दिल्लाथ्व द्वादशी -

विद्यतु प्राधिकरणविरुद्ध स्वंगू उद्योगी संगठन छप्पँ

येँ – उद्योगी व्यवसायीतय् स्वंगुलिं संगठन नेपाल विद्युत प्राधिकरण विरुद्ध छप्पँ जूगु दु । न्हापांनिसें थःथवय् बांलाःगु सम्बन्ध मदुपिं नेपाल उद्योग वाणिज्य महासंघ, नेपाल उद्योग परिसंघ व नेपाल चेम्बर अफ कमर्स मतया बक्यौता पुलेगु मामिलाय् धाःसा छथाय् च्वंवःगु खः ।

प्राधिकरणं ट्रंकलाइन मार्फत मत कयातःपिं खुगुलिं मल्याक तःधंगु उद्योगतय्त ध्यबा पूवयेत पौ च्वयेवं थ्व स्वंगुलिं संगठन प्राधिकरणविरुद्ध एकजुट जूवःगु खः ।थुकिया निंतिं स्वंगुलिं संगठनया नायःपिं मंगलवाः महासंघया ज्याकू टेकुइ बैठक च्वंगु दु । प्राधिकरणं उद्योगीतय्त समस्या जुइकथं महसुल निर्धारण याःगु धासें स्वंगुलिं संगठन थुकिया विरुद्ध एकजुट जुयाः न्ह्याःवनेगु खँ धाःगु दु ।

उमिसं २४ सै घन्टा मत मछ्यःगु उद्योगयात नं प्रिमियम भाः तयाः महसुल निर्धारण याःगु खँ धयाच्वंगु दु । उमिसं डेडिकेटेड फिडर पाखें मखसे मेमेगु सरह हे जक मत छ्यलागु जूगुलिं थिकेगु भावं ध्यबा पुलेमफइगु खँ धयाच्वंगु दु । उद्योगीतय्सं सबस्टेशन मतसे दथुं तार सालाः मत छ्यःपिंत नं प्रिमियम शुल्क निर्धारण याःगु द्वपं बियाच्वंगु दु ।

मेखे प्राधिकरणं महसुल विवाद तच्वयेवं हरेक उद्योगय् वनाः मिटर स्वयाः समस्या ज्यंकेगु निंतिं पहल याःगु दु । प्राधिकरणं टाइम अफ डेट (टिओडी) मिटरपाखें बिलिङ्ग स्वयां समस्या ज्यंकेगु कुतः यानाच्वंगु खँ धाःगु दु । प्राधिकरणया छम्ह उच्च अधिकारीं न्हापा फुक्कं उद्योगयात छगः हे बास्केट तयाः विलिङ्ग याःगुलिं समस्या वःगु धासें आः हरेक उद्योगय् वनाः उमिसं छ्यःगु मत स्वयाः समस्या ज्यंकेत्यनागु व थुकिं याउँक हे समस्या समाधान जुइगु खँ धाःगु दु ।

प्राधिकरणया कथं थांैकन्हय् देय्न्यंकं डेडिकेटेड फिडरपाखें२३१ गूव ट्रंक लाइन पाखें ६७ ग्राहकतय्सं मत छ्यलाच्वंगु दु । थुकि मध्ये प्राधिकरणं १८४ म्ह ग्राहकतय्त प्रिमियम दरया विद्युत महसुल लागू याःगु खः ।