गभर्नर ल्ययेत रोचक धेंधेंबल्लाः

इच्छुकपिं दोवदारत शक्ति केन्द्रय् ब्वाँय् वनेगु शुरु

येँ – नेपाल राष्ट्र बैंकया डेपुटी गभर्नर शिवराज श्रेष्ठ विरुद्ध सरकारं याःगु छानबिनं छुं हे खँ पत्ता मजुयाः श्रेष्ठयात सफाई बीवं आः थ्वहे वइगु चैत्रं न्हूम्ह गभर्नर ल्ययेत जुइगु धेंधेंबल्लाः झन रोचक जुइगु खने दया वःगु दु ।

वर्तमान गभर्नर चिरंजीवी नेपालया म्याद चैत्र ६ गते सिधयेत्यंगु दुसा वय्कलं म्याद सिधइगु लछि न्ह्यः हे बिदा कायेमाःगु प्रावधान दु। वयां लिपा न्हूम्ह गभर्नर सिफारिस यायेगु लागिं सरकारं छगू कार्यदल गठन याइ । उगु कार्यदलय् मन्त्री लिसें पुलांम्ह गभर्नरपिं नं दुजः कथं च्वनी ।

अज्याःगु कार्यदलं मुक्कं स्वम्ह मनूया नां सिफारिस याइ । थ्व स्वम्ह मध्ये छम्ह राष्ट्र बैंकया निम्ह मध्ये डेपुटी गभर्नरया नां अनिवार्य रुपं समावेश जुइमाः । थौंकन्हय् राष्ट्र बैंकय् श्रेष्ठ लगायत चिन्तामणि शिवाकोटी नं डेपुटी गभर्नरया रुपय् कार्यरत दु। यदि श्रेष्ठयात थ्व दौडं चीके फत धाःसा थःगु नां सिफारिस जुइ धकाः शिवाकोटीं हे सम्पत्ति शुद्धीकरणया थः मनूया साथ कयाः श्रेष्ठयात निलम्बन याकेगु खेल म्हितूगु अनुमान याःगु दु ।आः श्रेष्ठ ‘क्लिन चिट्’ कयाः लिहां वःगुलिं थ्व धेंधेंबल्लाः रोचक मोडय् थ्यंगु खः । शिवाकोटी स्वयां श्रेष्ठया ‘प्रोफाइल’ यक्व झ्यातुगुलिं वय्कःया यक्व सम्भावना दुगु खँ धयाहःगु दु ।

थौंकन्हय् गभर्नरया लागिं लगानी बोर्डया प्रमुख महाप्रसाद अधिकारी व राष्ट्र बैंकया पुलांम्ह कार्यकारी निर्देशक भाष्करमणि ज्ञवालीया नां नं चर्चाय् वयाच्वंगु दु। मेम्ह सम्भावित उम्मेदवार राष्ट्र बैंकया कार्यकारी निर्देशक महेश्वर श्रेष्ठ धाःसा म्हिगः तिनि अवकाशय् वंगुलिं वय्कः धेंधेंबल्लाखय् मलाइगु खँ धाःगु दु। न्हूम्ह गभर्नर नियुक्त जुइगु लागिं सम्भावित सकलें दावेदारत थःथः शक्ति केन्द्रतय्थाय् ब्वाँय् वनेगु नं शुरु जुइधुंकूगु दु ।

डेपुटी गभर्नर श्रेष्ठया धापू
सरकारपाखें नकतिनि सफाइ प्राप्त यानादीम्ह डेपुटी गभर्नर शिवराज श्रेष्ठ म्हीगंनिसें हानं ज्याकू वनेगु शुरु जूगु दु । म्हीग वय्कःयात ज्याकुथी कर्मचारीतय्सं लसकुस याःगु खःसां गभर्नर चिरंजीवी नेपाल व डेपुटी गभर्नर चिन्तामणि शिवाकोटीं धाःसा लसकुस याः मवः । डेपुटी गभर्नर श्रेष्ठं थः आः गभर्नर पदया लागिं दावेदार जुयाः हे न्ह्यःने वनेगु खँ ‘नेपालभाषा टाइम्स’ यात कनादीगु दु । थःत सफाई प्राप्त जुइधुंकाः तक नं प्रधानमन्त्रीया कलाःपाखें सफाई बीकूगु धकाः आधारहिन खँ पित हयाच्वंगु धासें आः प्रतिद्वन्द्वीतय्के क्षमताया आधारय् प्रतिस्पर्धा यायेगु आँट मदयाः थज्याःगु खँ मिडियाय् च्वके बियाच्वंगु द्वपं नं वय्कलं बियादीगु दु ।

सम्बन्धित बुखँ

LEAVE YOUR COMMENTS