नेपाल उद्योग वाणिज्य महासंघया कोषाध्यक्षया राजीनामा स्वीकृत

येँ –  नेपाल उद्योग वाणिज्य महासंघया कोषाध्यक्ष ज्ञानेन्द्रलाल प्रधान बिउगु राजीनामा स्वीकृत याःगु दु । कोषाध्यक्ष प्रधानं मौखिक रुपं बिउगु राजीनामायात आइतवाः च्वंगु महासंघया बैठकं स्वीकृत याःगु खः । कृषि उद्यम केन्द्रय् जूगु अनियमितताया सुचं पितबिउगु द्वपं लायेवं कोषाध्यक्ष प्रधानं मौखिक रुपं राजीनामा बिउगु खः ।

प्रधानं मौखिक रुपं जक राजीनामा धाःगु खःसां महासंघया बैठकं वय्कःया राजीनामा स्वीकृत जूगु माइन्युट तकं यायेधुंकूगु खँ धाःगु दु । केन्द्रय् जूगु अनियमितता बारे सुचं पितबिइगु लिसें अख्तियारय् उजुरी तःगु धयागु द्वपं बिइवं प्रधानं घौछि तक न्ववासें राजीनामा बियादीगु खः ।

महासंघया अध्यक्ष भवानी राणां प्रधानं केन्द्रय् जूगु अनियमितता बारे पत्रकारतय्त सुचं बियाच्वंगुया अडियो हे बैठकय् न्यंकुसें प्रधानयात ब्वःबिउगु खः । अध्यक्ष राणां प्रधानं थज्याःगु सुचं पितबियाः महासंघया गरिमा धराशायी यायेत स्वःगु धकाः ब्वःबिउगु खः । प्रधानं थौं केन्द्रय् जूगु अनियमितता बारे पूवंक जानकारीसहित लिखित रुपं राजीनामा बीत्यंगु खँ धाःगु दु ।

प्रधानं आइतवाः जूगु बैठकय् हे केन्द्रय् जुयाच्वंगु भ्रष्टाचार अथें तुलुतुलु जक स्वयाच्वने फइमखु धकाः धयादीगु खः ।कृषि उद्यम केन्द्र महेशलाल प्रधान अध्यक्ष जुयाच्वंबलय् महासंघं स्थापना याःगु खः । थ्व केन्द्रयात सरकारया लिसें गैरसरकारी संस्थातय्सं अनुदान बिइगु याना वयाच्वंगु खः ।

तर थन वःगु ध्यबा महासंघया उच्च पदाधिकारीतय्सं हे चुनावया इलय् थीथी थासय् प्रचारया निंतिं वनीगु भ्रमणय् तकं खर्च यानाच्वंगु खँ धाःगु दु । महासंघया दुनेया पदाधिकारीपिंस. विदेश चाःहिउ वनेबलय् तकं बिल पेश यानाः केन्द्रपाखें ध्यबा कायेगु यानाच्वंगु खँ धाःगु दु । केन्द्रं संचालन यानाच्वंगु एक गाउँ एक उत्पादन थेंज्याःगु कार्यक्रमया निंतिं वःगु ध्यबा थुकी खर्च यायेगु स्वयां नं भ्रमण व भत्ताय् जक अप्वः खर्च यानाः दुरुपयोग यानाच्वंगु दु ।

सम्बन्धित बुखँ

LEAVE YOUR COMMENTS