प्राचीन बनेपा महोत्सव क्वचाल
येँ(नेपालभाषा टाइम्स)÷येँय् नं पूर्व लाःगु प्राचीन व ऐतिहासिक सहर भ्वतय् प्राचीन बनेपा महोत्सवया ग्वसाः ग्वःगु दु । स्थानीय युवा उद्यमी मञ्चया ग्वसालय् भ्वत नगरपालिका व काभे्र उद्योग वाणिज्य संघया समन्वयय् उगु महोत्सव जूगु खः ।
भ्वत सहरया ऐतिहासिक, सांस्कृतिक महत्व बारे जानकारी बीगु उद्देश्यं वंगु माघ १ गते घ्यःचाकु संल्हूकुन्हु ग्वसाः ग्वःगु महोत्सव न्ह्यः सांस्कृतिक बाजं, परम्परागत प्याखंलिसें नगर परिक्रमा याःगु खः । परिक्रमा लिपा भ्वतया लाय्कुलिइ ग्वसाः ग्वःगु महोत्सवया उलेज्या यासें बागमति प्रदेशसभा सदस्य कञ्चनचन्द्र वादे श्रेष्ठं थुकथंया सांस्कृतिक महोत्सवं प्राचीन नगरया म्हसीका बीगु नापनापं प्राचीन सम्पदा संरक्षण, संवद्र्धन व प्रवद्र्धनय् नं ग्वाहालि जुइगु विश्वास प्वंकादिल ।
भ्वत नगरपालिकाया प्रमुख शान्तिरत्न शाक्यं भ्वत नगर ऐतिहासिक सम्पदाया थाय् जूगु धासें थुकिं पर्यटन विकासय् महत्वपूर्ण भूमिका म्हिताच्वंगु दु धयालि । वय्कलं सम्पदापे्रमीतय्त भ्वं देय्या भ्रमण यायेत इनाप यासें महोत्सवं भ्वत देय्यात आन्तरिक व बाह्य पर्यटक आकर्षित यायेत नं ग्वाहालि जुइगु विश्वास प्वंकादिल ।
ग्वसाः खलःया नायः सरोजकाजी श्रेष्ठं भ्वतया लाय्कू, चोक व पुरातात्विक सम्पदाया थःगु हे महत्व दुगु तर प्रचार प्रसारया अभावं ध्याकुनय् लानाच्वंगु अज्याःगु सम्पदाया म्हसीका बीत हे थुकथंया महोत्सवया ग्वसाः ग्वयागु जानकारी बियादिल ।
महोत्सवय् भ्वतया लाय्कलिइ सांस्कृतिक बाजं, लाय्कू दबू व चुकय् सांस्कृतिक व परम्परागत प्याखंया प्रदर्शनी याःगु खःसा चुक, ननि, सतक, पुखू लगायतया थासय् भ्वं देय्या म्हसीका बीगु किपा ब्वज्या याःगु खः । आपालं स्थानीय उत्पादनया ब्वज्या नं याःगु महोत्सवय् नेवाः नसाज्वलंया स्टल नं तयातःगु खः । ब्वज्याय् भ्वं देय्यात म्हसीकीगु सफू, रञ्जना लिपि च्वज्या, बाखं न्यंकेगु नापं झ्वः भ्वय्या नं ग्वसाः ग्वःगु खः ।
येँय् नं करिब २५ गू किलोमिटर पूर्वय् लाःगु ऐतिहासिक सहर भ्वँत काभे्रपलाञ्चोक जिल्लाया जक मखसे पूर्व लागां स्वनिगः दुहां वयेगु मू लुखाकथं नं कायेगु याः । भ्वँतया संस्कृतिलिसें शिक्षाविद् ज्ञानकाजी मानन्धरयाकथं नेपालभाषां ‘बने’या अर्थ व्यापार व ‘पा’या अर्थ वस्ती वा थाय् जुया बनेपा जूगु व थुगु थाय् व्यापारीतय् प्रमुख थाय् जूगु धयादी ।
LEAVE YOUR COMMENTS