न्हूसतकय् व्यापारीतय् प्रदर्शन

येँ – पसः चायेके बीमाःगु माग यासें थौं न्हूसतकया व्यापारीतय्सं प्रदर्शन याःगु दु । व्यापारीतय्सं सामाजिक दुरी कायम यानाः व्यापार व्यवसाय याये दयेमाः धकाः प्लेकार्ड ज्वनाः प्रदर्शन याःगु खः । प्रदर्शनया झ्वलय् व्यापारीतय्सं ‘७८ न्हुया लकडाउन दुने सरकारी तयारी ग्वः’, ‘लकडाउनया इलय् जूगु क्षतिया क्षतिपूर्ती यायेमाः’, ‘बैंक व वित्तिय संस्थाया ब्याज मिनाहा यायेमाः’, ‘तःधंपिं ब्यापारीयात मुले तयेगु, चीधंगु व्यापारीतय्त बेवास्ता यायेगु ज्या बन्द यायेमाः’, ‘राहत प्याकेज घोषणा यायेमाः’, ‘कोरोनां सीपिं झिंन्याम्ह जक, तर आत्महत्या याःपिं १३००’, ‘रहरं मखु बाध्यतां पसः चायेकेमाःगु ’ धकाः च्वयातःगु प्लेकार्ड ब्वयाः न्हूसतकय् धर्ना बिउगु खः ।

व्यापारीतय्सं स्वतःस्फूर्त रुपं पसः चायेकूसां प्रहरी वयाः बन्द याकेवं व्यापारीत धर्नाय् कुहां वःगु खः । म्हिगः नं व्यापारीतय्सं पसः चायेकूगु इलय् प्रहरीं बन्द यायेवं छझाः झडप हे जूगु खः । थौं नं पसः चायेकः वःपिं व्यापारीतय्त पसः चायेके मबिइवं धर्ना च्वंगु खः ।

नेपाल राष्ट्रिय व्यवसायी महासंघं सरकारं थौंया दुने पसः चायेके बीगु बारे निर्णय यायेमाःगु माग याःगु दु । थौं दुने सरकारं निर्णय पसः चायेके मबिल धाःसा आन्दोलन तच्वयेकेगु खँ महासंघं धाःगु दु ।

मेखे थौं लकडाउन ह्वालुकेगु कार्यविधि बारे सहलह यायेत मन्त्रिपरिषदया बैठक च्वनेत्यंगु दु ।

नेपालभाषा टाइम्स

च्वमिया मेमेगु

• तोखाया धर्म संस्कृति सम्बन्धी सफू
• यःसिं हनुमानध्वाखा थ्यन
• देय दबूया स्वीक्वःगु बुसादँ हन
• आः लाइसेन्सया पलेसा क्युआर कोर्ड दुगु रसिद
• माओवादीपाखें नं खुसि मापदण्डया विरोध