कसाः मिसातय्त उद्घोषण तालिम

येँ(नेपालभाषा टाइम्स)- कसाः तःधं गुथिपाखें मिसातय्त लक्षित यानाः उद्र्घोषणा तालिमया ग्वसाः ग्वःगु दु । गुथिया मिसा पुचःपाखें उकथंया न्वचु कला तालिमया ग्वसाः ग्वःगु खः । गुथिया थःगु भवन कसाः ख्यः डल्लुइ छन्हुया उगु तालिम जूगु खः ।

पुचःया दांभरिं रत्नकमल कसाःया संयोजनय् न्ह्याःगु तालिमय् झिंच्याम्ह मिसापिंसं ब्वति कयादीगु खःसा सजना नकःमिं प्रशिक्षण बियादीगु खः । संयोजक कसालं मिसापिंत नं नवायेगु कलाय् क्षमता अभिवृद्धि यायेगु ल्याखं थुकथंया तालिम संचालन यानागु जानकारी बियादीगु दु ।

पुचःया नायः विणा कंसाकारं प्रशिक्षक नकःमियात मतिनाया चिं लःल्हानादीगु खःसा प्रशिक्षार्थी निरन्तर कसालं थुकथंया तालिमां थःगु प्रतिभा पिब्वयेत ग्वाहालि जूगु विचाः प्वंकादिसें छन्हुया तालिम मगाःगुलिं वइगु दिनय् नं थुकथंया तालिम संचालन यायेमाःगु व तःन्हु तक संचालन यायेमाःगु विचाः तयादीगु खः ।