नेवाः सुचना केन्द्रया दँमुँज्या क्वचाल
यल (नेपालभाषा टाइम्स)÷ नेवाः सूचना केन्द्रया न्हय्क्वःगु दँमुँज्या शनिवाः लोक साहित्य परिषद्, बखुंबहाः यलय् क्वचाःगु दु । लुम्बिनी बौद्ध विश्व विद्यालयया डीन डा. मणिक रत्न शाक्य मूपाहाँ कथं झायादीगु ज्याझ्वलय् वय्कलं नेपालभाषाया ज्याझ्वःछगू हे इलय् मलायेमा धयागु तातुना नेपालभाषाया ज्याझ्वः बारे सुचं बीगु निंतिं नीस्वंगु थुगु सूचना केन्द्रं नेपालभाषा साहित्य संस्कृतिसम्बन्धी ज्याझ्वः फेसबुक पेजमार्फत प्रत्यक्ष प्रसारण यानाः वया च्वंगुलिं विशेष सुभाय बियादिल ।
रमिता बज्राचार्यया नायःसुइ क्वचाःगु ज्याझ्वलय् मूपाहां डा. शाक्यं नेवाः सूचना केन्द्रया अर्काइभ दयेकेया निंतिं थःगु पाखें फुगु ग्वाहालि यायेगु प्रतिबद्धता प्वंकादिल ।
नेपालभाषाया साहित्यकार नापं समाजसेवी हितकर वीर सिंह कंसाकारं नेवाः सूचना केन्द्र्र फेसबुक पेजया माध्यमं प्रत्यक्ष प्रसारण यानाः नेपालभाषाया ज्याझ्वःयात हलिंन्यंक थ्वयेका वयाच्वंगुलिं साहित्यकारपिंसं उकिया लबः कायेदुगुलिं लसता प्वंकादिल ।
सूचना केन्द्रयात नेपालभाषाया ज्याझ्वःया न्ह्यतु हे जानकारी बियाः प्रत्यक्ष प्रसारण यायेगु ह्वताः बियाः ग्वाहालि याना वयाच्वंगु थीथी संघ संस्थात नेपालभाषा एकेदेमि, बिराट नेपालभाषा साहित्य सम्मेलन गुथि, मिसा साहित्यकार मुना, नेवाः हाइकू, कविताया लाय्कू, सिद्धिदास प्रतिष्ठान, लोक साहित्य परिषद्, नेवाः स्यनामि दबू, जगतसुन्दर ब्वनेकुथिलगायतया थीथीसंस्थायात सुभाय पौ लःल्हाःगु खः ।
LEAVE YOUR COMMENTS