नेपालभाषा संकिपा संघ नीस्वन

येँ (नेपालभाषा टाइम्स)÷ नेपालभाषाया विकास याना यंकेगु खःसा थ्व भासं संकिपा (फिल्म) दयेकेगु ज्यायात तिबः बिया वनेमाः धइगु खँयात वाःचायेकाः ‘नेपालभाषा संकिपा संघ’ नीस्वंगु दु । नेवाः न्ह्यलुवा लिसें नेपाःया न्हापांम्ह ट्राफिक इञ्जिनीयर डा. शान्तवीरसिंह तुलाधरया पहलय् वय्कःया हे ज्याःजंक्व कुन्हु लाकाः उगु संघ नीस्वनेगु ज्या जूगु खः ।

संघया नायः कथं नांजाःम्ह हास्य कलाकार लिसें साहित्यकार हृदयप्रसाद मिश्र च्वनादीगु दु । संघया न्वकु पत्रकार लिसें ख्यालः च्वमि सुरेश किरण, छ्यांज्ये कलाकार श्यामसुन्दर सिल्पकार, दांभरि कलाकार अन्नपूर्णेश्वरी श्रेष्ठ जुयादीगु दुसा दुजलय् नांजाःम्ह निर्देशक लिसें च्वमि आर्यम नकःमि, लिपि विशेषज्ञ लिसें कलाकार शरद कसाः, गायक पवित्र कसाः, कलाकार कृष्णभक्त महर्जन, कलाकार अर्नेश्वरी श्रेष्ठ शिल्पकार व अधिवक्ता जुजुकाजी महर्जन (कानुनी सल्लाहकार) च्वनादीगु दु ।

संघं नेपालभाषां संकिपा दयेकीपिंत आर्थिक, प्राविधिक ग्वाहालि चूलाकाः उत्कृष्ट संकिपा दयेकेत तिबः बिया वनेगु उद्देश्य ज्वंगु दु । संघं थौं छगू पत्रकार सम्मेलन यासें थःपिनि औपचारिक घोषणा यायेगु ज्याझ्वः नं तयातःगु दु ।