क्यानाडाय् निक्वःगु मंकाः इहि मुना

येँ- क्यानेडियन नेवाः गुथिया ग्वसालय् निक्वःगु मंकाः इहि मुना ज्याझ्वः जुल । क्यानाडाय् च्वनाच्वंपिं नेवाःतय् संस्था गुथिया ग्वसालय् ब्राम्प्टनय् च्वंगु पशुपतिया द्यःयाथाय् उगु ज्याझ्वः जूगु खः ।

मंकाः इहि मुनाय् क्यानाडाया टोरन्टो, हालिफाक्स, ओट्टावा, ब्राम्प्टन, किचनर लगायतया थीथी थासय् च्वंपिं झिम्ह नेवाः मिसा मचाया इहि याःगु खः ।
नेपालं उखेपाखे वनाच्वनादीम्ह प्रा. डा. नरेशमान वज्राचार्य मूल गुरुजु जुयाः इहि मुना ज्याझ्वः यानादीगु खःसा इहि संस्कारया बारे जानकारी नं बियादीगु खः । प्रा. डा. वज्राचार्यं नेवाः संस्कारय् इहि यायेगु अर्थ म्ह्याय् मचायात ज्ञान, दिव्यवस्त्र लःल्हायेगु व समाःया बारे जानकारी याकेगु भिंगु ई खः धयादिल ।

सी मध्ये उत्कृष्ट ब्याः थें थः म्ह्याय् मचा नं अथे हे जुइमाः धइगु ल्याखं उकिया हे प्रतीकया रुपय् ब्याःलिसे इहिपा यानाबीगु जूगुलिं थः म्ह्याय् नं सर्वगुण सम्पन्न याकेगु उद्देश्यं संकल्प यायेगु प्रचलन हे इहि यायेगु संस्कार जूगु वय्कलं कनादिल ।

गुथिया न्वकु उत्तम माकजुं गुथिपाखें थीथी क्रियाकलाप व गतिविधित याना वयाच्वंगुलिइ सेवा, संस्कार व नेवाः परम्पराया संरक्षण यायेकथं समुदायया आवश्यकतायात वाःचायेकाः उकियात हे संबोधन यायेकथं निक्वःखुसी मंकाः इहि मुनाया ग्वसाः ग्वयागु जानकारी बियादिल ।

वय्कलं नेवाः संस्कार दक्वं विज्ञान सम्मत जूगु तर उकिया विस्तृत रुपं ब्याख्या यायेगु ज्या मजुया वंगुलिं थुकथंया महत्वं जाःगु संस्कार, संस्कृतित न्हना वनीगु अवस्थाय् थ्यनाच्वंगु खँय् दुःख प्वंकादिसें न्हू पुस्तायात नेवाः संस्कार, संस्कृतिया बारे जानकारी बिया वनेमाःगु आवश्यक जूगु खँय् बः बियादिल ।

गुथिया मूछ्याञ्जे विमलमान श्रेष्ठं ज्याझ्वलय् झायादीपिं सकसितं लसकुस यासें गुथिपाखें सन् २०२० मार्चय् न्हापांखुसी थुकथं मंकाः इहि मुना ज्याझ्वः यानागु व सकसिगुं ग्वाहालिं निक्वःखुसी थुकथंया ज्याझ्वः यायेखंगुलिं लसता प्वंकादिल ।

गुथिया मिसा पुचःया कजि रञ्जना सैंजूं पुचःपाखें वइगु अगस्ट महिनाय् ‘नेवाः भ्वय्’या ग्वसाः ग्वयेत्यनागु जानकारी बियादिसें सकसितं ब्वति कयादीत इनाप यानादिल । गुरुमां सविना शाक्यं थःगु संस्कृतिया संरक्षणया निंतिं ग्वाहालि याये खंगुलिं लसता प्वंकादीगु ज्याझ्वलय् इहि यानादीम्ह मतिल्डा महर्जनं नं नुगःखँ तयादीगु खः ।

छ्याञ्जे सुमन राजवशीं सुभाय् देछानादीगु ज्याझ्वलय् मू गुरुजु प्रा. डा. वज्राचार्ययात गुथिया न्वकु माकजुं दोसल्लां न्ययेकाः व मूछ््याञ्जे श्रेष्ठं कदरपत्र लःल्हानादीगु खः ।