मानन्धर संघया ध्वाँय् ब्वयेकूम्हेसित हना

नेपालभाषा टाइम्स

येँ / सगरमाथा च्वकाय् केन्द्रीय मानन्धर संघया ध्वाँय् ब्वयेकूम्ह सगरमाथा आरोही दावा शेर्पायात म्हिगः छगू ज्याझ्वःया दथुइ मानन्धर संघं सम्मान यात । शेर्पां वंगु जेठ ६ गते सगरमाथा च्वकाय् संघया ध्वाँय् ब्वयेकूगु खः । दावा शेर्पां आः तक च्याक्वः सगरमाथाया सफल आरोहण यायेधुंकूगु दु ।

म्हिगः संघं याःगु ज्याझ्वलय् येँ मनपाया मेयर विद्यासुन्दर शाक्यं ध्वाँय् ब्वयेकादीम्ह शेर्पा व उकिया व्यवस्थापन यानादीम्ह मिङ्मा शेर्पायात सम्मान याःगु खः । म्हिगः केन्द्रीय मानन्धर संघया ग्वसालय् थीथी त्वालय् जुयाच्वंगु धाः बाजं प्रशिक्षण व त्वाःगुथियात धाः बाजं लःल्हाइगु ज्याझ्वलय् तुं उगु हनेज्या नं याःगु खः ।