वतु भद्रकाली देगः पुनःनिर्माण शुरु

येँ- येँ महानगरपालिका वडा नं. २२ य् लाःगु वतु त्वालय् च्वंगु वतु भद्रकाली देगः पुनःनिर्माण ज्या न्ह्याःगु दु । २०७२ सालया तःभुखाचं पूर्णरुपं क्षति जूगु देगः पुनःनिर्माणया निंतिं वंगु वालय् शिलान्यास याःगु खः ।

येँ महानगरपाकिाया प्रमुख विद्यासुन्दर शाक्यं देगःया शिलान्यास यानादीगु खः । उगु इलय् देगः शिलान्यास यानादिसें येँ मनपा प्रमुख शाक्यं गोरखा केन्द्र विन्दु जुयाः २०७२ साल बैशाख १२ गतेया तःभुखाचं क्षति जूगु दक्वं सम्पदास्थल पुनःनिर्माण यायेमाःगु आवश्यक जूगु खँय् बः बियादिसें थुगु ज्याय् सकसिनं ग्वाहालि यायेत इनाप यानादिल ।

ज्याझ्वलय् येँ मनपाया उपप्रमुख हरिप्रभा खड्गी श्रेष्ठं धार्मिक, सांस्कृति व ऐतिहासिक सम्पदा पुनःनिर्माण यायेमाःगु व थुगु खँय् सकसिगुं चिउताः नं उलि हे दयाच्वंगु धयादिल । सकसिनं उलि हे चिउताः क्यनाच्वंगु खःसां थीथी कारणं आपालं थासय् ज्या न्ह्याके मफयाच्वंगु अवस्थाय् आः तालिका मिले यानाः ज्या न्ह्याका वनेमाः धयादिल ।

वइगु दछिया दुने हे निर्माण सम्पन्न यायेगु ल्याखं पुनःनिर्माण शुरु जूगु देगःया निंतिं छगू करोड २० गू लाख तका बजेट विनियोजन यानातःगु दु । तत्कालीन जुजु प्रताप मल्लया पालय् निर्माण जूगु धयातःगु देगःया लिसें मेमेगु आपालं सम्पदा भुखाचं क्षति जूगु खः ।