महाविहारया पहिचान विषयय् सहलह

येँ(नेपालभाषा टाइम्स)÷थनया सीघलय् च्वंगु श्री शान्तिघट वज्रधातु चैत्य महाविहार सर्वसंघपाखें ‘श्रीशान्तिघट महाविहार झीगु पहिचान’ विषयय् छगू सहलह मुँज्या याःगु दु । महाविहार सर्वसंघया न्हूपुस्ता विशेष यानाः काय, म्ह्याय् व भौमस्त मुनाः उगु सहलह मुँज्या याःगु खः ।

श्रीशान्तिघट वज्रधातु चैत्य महाविहार संरक्षण समितिया नायः शुभकाजी शाक्यया सभापतित्वय् न्ह्याःगु ज्याझ्वलय् सहलह मुँज्याया कजि रविन्द्र शाक्यं लसकुस यासें सीघः बहाःया नामं म्हसिका वयाच्वंगु महाविहार सर्वसंघया न्हू पुस्तयात जागरुक व सचेतना अभिवृद्धि यायेगु ल्याखं थुकथंया सहलह मुँज्या यानागु जानकारी बियादिल ।

समितिया छ्याञ्जे पुरण शाक्यं समाजया हरेक ख्यः आधुनिकीकरणं हा कया वनाच्वंगु इलय् ईयात ल्वयेक धर्म, संस्कृति, संस्कार व सामाजिक व्यवहारय् नं हिउपाः वःगु खने दयेकेकथं थुकथंया सहलह मुँज्याया ग्वसाः ग्वयागु जानकारी बियादिसें थुकथंया ज्याझ्वः नियमित रुपं याना यंकेगु व ईकथं व्यवहार याना वनेत आवश्यक सहलह याना वनेगु खँ कनादिल ।

धार्मिक, सांस्कृतिक, सामाजिक नापं आर्थिक ख्यलय् ल्याय्म्ह पुस्ताया सहभागिताया आवश्यकतयात वाःचायेकाः सर्वसंघपाखें सचेतना अभिवृद्धि यायेगु ल्याखं थुकथंया ज्याझ्वः निरन्तर रुपं न्ह्याका वनेगु सर्वसंघं जानकारी बिउगु दु ।

सर्वसंघया थाकुलि आजु कर्ण शाक्यया भिंतुना सन्देश ब्वनाः न्यंकूगु ज्याझ्वलय् ब्वति कयादीपिंत धार्मिक, आर्थिक व सामाजिक यानाः स्वगू पुचलय् ब्वथलाः सहलह ब्याकूगु खः ।