नेवाः वस्तीइ सकसिनं नये खनीगु अभियान

येँ – हलिं नेवाः गुथिया झिक्वःगु तःमुँज्या वंगु शनिवाः नेवाः बस्ती ल्ह्वंखाय् तःजिक जुल । नेवाःतय्त आर्थिक रुपं सक्षम यायेगु नापं नेवाः अधिकारया निंतिं न्ह्याः वनेगु अवधारणा ज्वनाः थनिं झिदँ न्ह्यः पलिस्था जूगु गुथिं दँय्दसं तःमुँज्या यायेगु व निदँय् छक्वः न्हूगु नेतृत्व ल्ययेगु याना वयाच्वंगु दु ।

थुगुसी जूगु तःमुँज्यां जुजुमान श्रेष्ठया नेतृत्वय् न्हूगु ज्यासना पुचः नं ल्यःगु खः । तःमुँज्याया उलेज्या यासें मूपाहां जनकवि दुर्गालाल श्रेष्ठं थः नेवाः बस्तीइ नेवाःतय्त थनेत धकाः वयागु खःसां गुथिया सक्रियता खनाः थःत हे तनाबिउगु विचाः तयादिल । आःया अवस्थाय् नेवाःतय्सं थःगु अस्तित्व व पहिचानया निंतिं संघर्ष यानाः न्ह्याः आवश्यक जूगु खँय् बः बियादिसें वय्कलं विना संघर्ष नेवाःतय् भविष्य सुनिश्चित मजू धयादिल ।

गुथिया दुजः नापं नेवाः पत्रकार राष्ट्रिय दबूया नायः श्रीकृष्ण महर्जनं तःमुँज्याया बन्दसत्रं गुथिं आः नेवाः वस्तीइ सकल नेवाःतय्सं नये खनीगु अभियान न्ह्याकेगु निर्णय याःगु जानकारी बियादिल ।लिसें वय्कलं स्वनिगलय् नेवाःतय्त विस्थापित यायेकथं विकासया नामय् हयाच्वंगु थीथी योजनाया विरोध यासें नेवाःतय्त स्वनिगलं विस्थापित मयाकेगु व नेवाः हक अधिकारया निंतिं संघर्ष याना वनेगु निर्णय याःगु जानकारी बियदिल ।

उपत्यकाव्यापी सतक विस्तार संघर्ष समितिया नायः सुमन साय्मिं सतक विस्तार विरुद्धया आन्दोनलय् गुथिं ज्वःमदुगु भूमिका म्हितूगु धासें लिपा लिपा नं थुकथंया हे ग्वाहालि दयाच्वनीगु आशा यानादिल । मूलवासी जागरण अभियानया विधुप्रकाश कायस्थं गुथिं आः राष्ट्र संघलिसे समन्वय यानाः थःपिनिगु आज्जु पूवंकेगु स्वयेमाः धयादिल ।

गुथिया संस्थापक नायःलिसें ज्याझ्वःया सभापति शान्तप्रकाश श्रेष्ठं हलिं नेवाः गुथि नेवाःतय्त बचे यायेत, नेवाःतय् लजगाः व हक अधिकार सुनिश्चित यायेतनापं नेवाः भावना विकास यायेत वःगु संस्था खः धासें आः नं स्वनिगःया नेवाःत छप्पँ मजुल धाःसा नेवाःतय्त थनं पितिना छ्वइगु अवस्था वइगु ख्याच्वः बियादिल ।

तःमुँज्यां नेवाःतय्त आर्थिक रुपं सक्षम यायेगु, नेवाः लजगाः, नेवाःतय् हक अधिकार, नेवाः पहिचान सुनिश्चित यायेगु व उकिया निंतिं सकलें जाना वनेमाःगु व उकिया निंतिं अभियान न्ह्याकेगु घोषणा नं याःगु खः । ज्याझ्वलय् मूपाहां जनकवि श्रेष्ठं विश्वविजेता शारीरिक सुगठक महेश्वर महर्जन, गुथिया स्थापनकालंनिसें सक्रिय जुयाच्वनादीम्ह टिकाराम महर्जन व ल्ह्वंखाया ज्याथजिथिपिंत दोसल्लां न्ययेकाः हनापौ लःल्हानादीगु खः ।

 

सम्बन्धित बुखँ

LEAVE YOUR COMMENTS