ने. सं. ११४४ कौलाथ्व षष्ठी -

येँ महानगर दुने पूर्वाधार निर्माण यायेत न्हय्गू सर्त अनिवार्य

येँ(नेपालभाषा टाइम्स)- येँ महानगर दुने आवंलि पूर्वाधार निर्माण व मर्मत यायेबलय् न्हय्गू सर्त अनिवार्य पालना यायेमाःगु जूगु दु । पूर्वाधार निर्माण व मर्मत यायेबलय् नागरिकयात समस्या जुइगु धासें आवंलि अज्याःगु ज्या यायेबलय् अनिवार्य रुपं न्हयगू सर्त पालना यायेमाःगु महानगरं न्ह्यथंगु दु ।

पूर्वाधार निर्माण व मर्मत वा अज्याःगु गुगुंकथंया ज्या यायेबलय् लँय् वये वने याइपिंत असुविधा जुइ मजिउगु, धू व धुफ्वः दनीगु ज्या याये मजिउगु, ज्या यायेबलय् धुफ्वः दनीगु जुल धाःसा छचाःखेरं खनेमदयेक त्वपुइमाःगु, ज्या जुयाच्वंगु थासय् संकेतपाटी तयेमाःगु, निर्माणया ज्या यायेबलय् फत्तले बहनिसिया इलय् जक यायेमाःगु, ज्या यायेत माःगु बाहेकं अनावश्यक सामग्री द्वँचिना तये मजिउगु, ज्या सिधयेखतं सतकय् तयातःगु निर्माण सामग्री चिइकाः सतकयात दुरुस्त अवस्थाय् तयेमाःगु सर्त अनिवार्य यानागु येँ महानगरपालिका भौतिक पूर्वाधार महाशाखां जानकारी बिउगु दु ।

महाशाखाया प्रमुख राम थापां यदि सुनानं सर्त पालना मयात धाःसा थीथीकथंया कारवाहीया भागिदार जुइगु खँ कनादीगु दु । वय्कलं क्वःछिनातःगु सर्त पालना मयाइपिंत फोहरमैला व्यवस्थापन ऐन २०६८, वातावरण संरक्षण ऐन २०७६या लिधंसाय् न्याद्वःनिसें न्यय्द्वः तका जरिवाना यायेगु नापं अनाधिकृत रुपं तयातःगु निर्माण सामग्री गुगुं नं इलय् ल्ह्वना यंकेगु जुइ धयादिल ।

बर्खाया ई व थाय्थासय् लः मुना च्वनीगु नापं डुबानया सम्भावित समस्यायात ध्यानय् तयाः खुसि बाः वइगु थासय् च्वंगु अवरोध चिइकेत, महानगरया सतक व सतकया सिथय् (फुटपाथय्) तयातःगु अवरोधलिसें सहरी सुन्दरताय् लिच्वः लाइकथं न्ह्यःने लाःथाय् लाक्वपाक्व धंगं तयातःगु सामग्री व थीथी प्रयोजनया निंतिं तयातःगु तार व्यवस्थापनया विषयय् नं समन्वय आवश्यक जूगु वय्कलं धयादीगु दु ।

थुकथं हे धः निर्माण, बर्खां जुइगु सम्भावित डुबान व खुसिबालं प्रभावित जुइगु वस्तीया व्यवस्थापन, मटया लठ्ठाय् मिं नइगु सामुदायिक खिचाया व्यवस्थापन, सहरी सुन्दरता व व्यवस्थापन थेंज्याःगु ज्याय् आम नागरिकं महसुस याये फइकथं लिच्वः बी मफयाच्वंगु वय्कःया धापू दु ।

सतकया थीथीथाय् करिब ७० प्रतिशत मतया लठ्ठाय् ज्याख्यलय् मवयेधुंकूगु तार दुगु, तर समन्वयया अभावं उकिया व्यवस्थापन याये मफयाच्वंगु धासें अनावश्यक तार चायेगु ज्यां यक्वसित समस्या जुइगुलिं समन्वय मदयेकं पूर्वाधार निर्माण सम्भव मजूगु महाशाखां न्ह्यथंगु दु ।