ने. सं. ११४३ चौलाथ्व सप्तमी -

कोरोनाया स्वंगूगु लहर वइगु खतरा, व्यापक तयारी

येँ – आः वइगु निला लिपा कोरोना महामारीया स्वंगूगु लहर न्यना वनीगु अनुमान नेपाल सरकारं याःगु दु । स्वास्थ्य तथा जनसंख्या मन्त्रालयया नीति योजना तथा अनुगमन महाशाखां धाः कथं आः वइगु असोजया १५ गतेनिसें नेपालय् नं कोरोनाया स्वंगूगु लहर न्यना वनीगु सम्भावना दु ।

मन्त्रालयं धाः कथं कोरोना महामारी नियन्त्रणया लागिं सरकारं थौंकन्हय् लागू यानातःगु निषेधाज्ञा छ्वासुका यंकूगु, नियन्त्रणया लागिं दयेकातःगु नियमत क्वातुक पालना मयाःगु, स्वास्थ्य मापदण्डयात वास्ता मयाःगु आदि कारणं यानाः थुकिया हे लिच्वः कथं निला लिपा महामारीया स्वंगूगु लहर न्यना वनीगु तःधंगु सम्भावना दु ।

वंगूगु लहरया लिच्वः मस्तय्त कडा रुपं लाये फइगु खँ नं महाशाखां धाःगु दु । आः वइगु न्यालाया दुने नेपालय् करिब २ लाख न्हूपिं संक्रमित थपे जुइगु सम्भावना दु । उकी अप्वः यानाः मस्त नं लाइ । उकिं मस्तय्गु स्वास्थ्ययात कयाः सकलें सचेत जुइत नं मन्त्रालयं सचेत याःगु दु ।

आः ब्वलनीगु कोरोना महामारीं मस्तय्त यक्व प्रभावित यायेफुगु खँयात ध्यानय् तयाः सरकारं मस्तय्गु लागिं समेत अस्पतालया बेड व भेन्टिलेटर थपे यायेगु तयारी यानाच्वंगु दु । मन्त्रालयं धाः कथं आः मस्तय्गु लागिं १८० गू भेन्टिलेटर व २७५ गू आइसीयु थपे यायेगु लागिं तयारी न्ह्याकेधुंकूगु दु ।

लिसें आः मस्तय्त नं कोरोना विरुद्धया खोप बीगु तयारी शुरु याःगु दु । थौंकन्हय् नेपाःयात अनुदानया रुपय् वइगु व नेपालं न्याना काइगु थीथी खोपया मात्रा छथाय् तयेबलय् मस्तय्त समेत गाइगु खा धाःगु दु । आःयात १२ दँ स्वयां च्वय्यापिं मस्तय्त खोप बीगु तयारी सरकारं यानाच्वंगु दु ।

आः तक नेपालय् खोपया न्हापांगु मात्रा काःपिं मनूत १५.८ प्रतिशत थ्यनेधुंकूगु दुसा निगूगु मात्रा काःपिनि ल्याः ६.६ प्रतिशत थ्यंगु दु । आः वइगु असोज महिना तक नेपालय् १ करोड ५ लाख ४८ द्वः डोज खोप वइगु जुयाच्वंगु दु । थुकी नेपालं ध्यबा पुलाः न्याना हइगु व नेपाःयात अनुदान वइगु खोप दुथ्याः ।

असोजंनिसें चैत्र तक नेपालय् मुक्कं ३ करोड २३ लाख डोज खोप तयेगु व्यवस्था सरकारं यायेधुंकूगु दु । थुकी कोभिशिल्ड, मोर्डना, फाइजर, जोन्सन एण्ड जोन्सन व सिनोभ्याक दुथ्याः । सरकारं आः थथें २ करोड ६५ लाख मनूयात खोप बीगु ताः तयातःगु दु ।