बुंगद्यःया जात्रा १० गते हे यायेगु तयारी, सिडिओया मौखिक अनुमति, कन्हय् हाकनं सहलह जुइगु

यल – करुणामय बुंगःद्यःया जात्रा आः वइगु साउन १० गते हे यायेगु कथं तयारी जूगु दु । गुथि संस्थान यल शाखां बुधवाः हाकनं साउन १० गते नं बुंगःद्यःया जात्रा मयायेगु जुल धयागु पौ छ्वया हयेवं थाै‌ बिहिवाः जात्रालिसे सरोकारपिं फुक्कं जिल्ला प्रशासन कार्यालय यलय् डेलिगेशन वनाः जात्रा यायेगु बारे सहलह याःगु खः । सहलह लिपा आः १० गते हे जात्रा यायेगु कथं तयारी न्ह्याकूगु दु ।

थाै‌ बुंगःद्यःया पालाः च्वनीपिं पाँजु, साइत स्वइपिं जोशीत लिसें जात्राया सरोकारावालात बाराही, घःजु, ज्यापु समाज सकलें जिल्ला प्रशासन कार्यालयय् वंगु खः । थन सहलह जूबलय् यल जिल्लाया प्रमुख जिल्ला अधिकारी (सिडिओ) नारायण प्रसाद भट्टं थःपिंसं जात्रा दिकेत मधया धकाः धाःगु खँ सहलहय् सहभागीपिंसं धाःगु दु ।

सहलह सहभागी पानेजु कपिल वज्राचार्यं सञ्चारकःमिलिसे खँ ल्हासें सिडिओ भट्टं जात्रा यायेत मौखिक रुपं अनुमति बिउगु खँ धयादीगु दु । लिखित रुपं हे जात्राया अनुमति फ्वंबलय् धाःसा कोरोना संक्रमणया जोखिमया कारणं सरकारं छुं छुं ज्याखँय् प्रतिबन्ध तयातःगुलिं लिखित रुपं हे जात्रा अनुमति बीमफइगु, तर जात्रा जुल धाःसा थःपिंसं माःगु ग्वाहालि यायेगु खँ सिडिओ भट्टं धाःगु जानकारी बिउगु दु ।

सहलहय सहभागी दैवज्ञ ज्योतिष कीर्तिमदन जोशीं नं म्हिगःया बैठक लिपा जिल्ला प्रशासनं जात्रा पंगु खनेमदुगु धासें सिडिओं गुकथं फु उकथं सामाजिक दूरी कायम यानाः जात्रा यायेत धाःगु खँ कनादीगु दु । लिसें सिडिओं जात्राया तयारी बारे कन्हय् ११ बजे थःत जानकारी बीत व व लिपा थःपिंसं यायेमाःगु तयारी यायेगु खँ धाःगु नं कनादीगु दु ।

सिडिओलिसेया बैठक लिपा म्हिगः हे यल महानगरपालिकाय् महानगरप्रमुख चिरिबाबु महर्जनया उपस्थिति जात्रा गुकथं न्ह्याकेगु बारे सहलह जूगु खः । सहलहय् साउन १० गते हे द्यःयात रथय् बिज्याकेगु निर्णय याःगु खः । सहलह सहभागीपिं सकसिनं जात्रा गुगुं नं हालतय् न्ह्याकेमाः धकाः नं धाःगु खः ।

बुंगःद्यःया जात्रा जात्रा जक मखसे नेवाःतय्त एकताबद्ध याइगु जात्रा नं खः धासें थज्याःगु जात्रा दिकेगु यात धाःसा नेवाःतय्गु एकता नं त्वाःदःवनीगु खतरा दइगु खँ सहभागीपिंसं धाःगु खः ।

प्रशासनं जात्रा या–दिकी धकाः पनेगु मखु, प्रशासनया ज्या ला जात्राय् शान्ति सुरक्षा जक कायम यायेगु खः, जात्रा झीसं यायेगु खः धासें जात्रा यायेमाःगु खँ मेम्ह छम्ह पानेजुं धयादीगु दु ।

अथेहे पानेजु कपिल वज्राचार्यं सञ्चारकःमित लिसे खँ ल्हासें करुणामयया जात्रायात मेमेगु जात्रालिसे तुलना यानाः स्वये मजिउ धासें धयादिल, ‘करुणामयया जात्रा धयागु सकसितं करुणा तइम्ह द्यःया जात्रा खः । थुकिया जात्रा पशुपतिया लुखा छाय् बन्द जुल, येँ, ख्वपय् मेमेगु जात्रा छाय् मजुल धकाः तुलना यानाः स्वयाच्वने मजिउ ।’

सहलहय् सहभागी ज्योतिष कीर्तिमदन जोशीं नं आः न्ह्याथे यानाःसां साउन १० गते जात्रा न्ह्याके हे माःगु खँ धयादीगु दु । साउन १० गते जात्रा मजुल धाःसा द्यःयात बुंगय् लित यंकेत हे समस्या जुइगु खँ वय्कलं धयादीगु दु । साउन १० गते जात्रा मजुल धाःसा द्यः बुंगलय् लित यंकेगु इलय् तक बुंगः द्यः यलय् हयातःगु गुला क्यनीगु व गुला क्यनकी झी छेँय् लिहां वनेमजिउ धयागु धापू कथं बुंगय् यंकेमजिउगु, थ्व लिपा मलमास जुयाः यंकेमफइगु व अनं लिपा मोहनी सुरु जुल धायेवं ख्वपय् बुंगः द्यः यंकेमाः धयागु खँ पिहां वइगु जूगुलिं साउन १० गते हे गुगुं नं कथं जात्रा न्ह्याकेमाःगु धापू वय्कःया दु । वय्कलं धयादी, ‘साउन १० गते जात्रा जुल धाःसा च्यान्हु झिन्हुं जात्रा सिधयेकाः सौर्यमास कथं द्यः यलय् बिज्याकूगु गुला क्यने न्ह्यः हे बुंगय् लित यंकेखनी ।’

सम्बन्धित बुखँ

LEAVE YOUR COMMENTS