कैलालीइ स्वयंसेवी रक्तदाता समाजया केन्द्रीय बैठक

येँ – नेपाल स्वयंसेवी रक्तदाता समाजया केन्द्रीय बैठक कैलालीया टिकापुरय् क्वचाल । समाजया कैलाली जिल्ला शाखाया आतिथ्यताय् उगु बैठक जूगु खः । बैठकय् हिया व्यवस्थापनय् खने दयाच्वंगु समस्या, कमि कमजोरी व वइगु दिनय् यायेमाःगु सुधारया विषयय् दुग्यंक सहलह यासें थीथी निर्णय याःगु खः ।

लिसें उगु बैठकं देय्या कार्यकारी प्रमुख प्रधानमन्त्री ओली समक्ष हिया आपूर्तिइ खने दयाच्वंगु समस्या व सहज उपलब्धता नापं मेमेगु विषय दुथ्याकाः १८ गू बुँदाया ज्ञापन पौ लःल्हायेगु निर्णय नं याःगु दु । समाजं ताःई न्ह्यवंनिसें ल्ह्वना वयाच्वंगु निःशुल्क हिया आपूर्ति व हिं तयार याःगु रक्ततत्वत वितरण जुइमाःगु मागयात टिकापुर नगरपालिकां नगरवासीयात उपचार यायेगु झ्वलय् निःशुल्क रुपं आवश्यककथं हि व रक्ततत्व उपलब्ध याकेगु धकाः निर्णय याःगुयात लसकुस यासें सुभाय् नं देछाःगु दु ।

लिसें नगरपालिकां उकथं निर्णय याःगु धासें नगरप्रमुख तपेन्द्रबहादुर रावलयात समाजया केन्द्रीय अध्यक्ष प्रेमसागर कर्माचार्यं सम्मान नं यानादीगु खः ।थुकथं हे समाजं ल्ह्वना वयाच्वंगु मागयात देवदह नगरपालिकापाखें नं घोषणा याःगु व उकिया कार्यान्वयन यायेत समाजं इनाप याःगु दु । उगु इलय् समाजं पिथना वयाच्वंगु ‘हाम्रो रगत’ ख्वाःपौया न्हूगु ल्याः सम्मान स्वरुप प्रदान याःगु खः ।

सम्बन्धित बुखँ

LEAVE YOUR COMMENTS