
येँ(नेपालभाषा टाइम्स)- दँय्दसं थें थुगुसी नं थ्व हे वइगु थिंलाथ्व पुन्हि, यःमरि पुन्हिकुन्हु ज्यापु दिवस हनेगु निंतिं व्यापक तयारी जुयाच्वंगु दु । थुगुसी ज्यापु दिवस येँ महानगरपालिका २१ वडास्थित गोफः त्वाःया संयोजनय् जुइत्यंगु खः ।
थुगुसी १९ क्वःगु ज्यापु दिवस हनेत्यंगु खःसा थुकिया निंतिं आवश्यकथंया तयारी जुयाच्वंगु ग्वसाः खलकं जानकारी बिउगु दु । वइगु थिंलाथ्व पुन्हि यःमरि पुन्हिकुन्हु ज्यापु दिवस न्यायेकेत थीथीकथंया तयारीया ज्या न्ह्यानाच्वंगु दु ।
ज्यापु दिवस तयारी समितिया कजिं तकं जुयाच्वनादीम्ह ज्यापु महागुथि येँ महानगर समितिया नायः पंचनारायण महर्जनं यःमरिपुन्हिकुन्हु सुथसिया ७ ताः इलय् लगमय् मुनाः वृहत सांस्कृतिक ¥याली पिनेगु तयारी जुयाच्वंगु जानकारी बियादीगु दु । थ्वकुन्हु लगमय् मुनाः सांस्कृतिक ¥याली पिथनेगु व येँया थःने, क्वःने लागा चाःहिलाः वसन्तपुलिइ थ्यंकाः सभाय् हिलेगु तयारी जुयाच्वंगु दु । ग्वसाः खलकं बिउगु जानकारीकथं वसन्तपुलिइ जुइगु सभाय् प्रधानमन्त्रीयात मूपाहांकथं ब्वनातःगु दु ।
ज्यापु दिवस तःजिक हनेगु निंतिं त्वाः त्वालय् सहलह, भेला, मुँज्या यायेगु नापं प्रचार प्रसारया ज्या नं जुयाच्वंगु तयारी समितिया नायः महर्जनं कनादीगु दु । प्रचार प्रसारया हे झ्वलय् वइगु थिंंलाथ्व दशमि (मंसिर १७ गते) लगं त्वालं छगू सुकुन्दा ¥याली नं पिथनीगु जूगु दु ।
ज्यापु दिवसकुन्हु मू ज्याझ्वः जुइगु वसन्तपुलिइ नेवाः जाति, भाषा, साहित्य, संस्कृति, पहिचान आदि ख्यलय् योगदान बियादीपिं नापं विशिष्ट व्यक्तित्वपिंत थीथी सम्मान नापं सिरपाः लःल्हायेगु ज्याझ्वः तयातःगु दु ।
LEAVE YOUR COMMENTS