थुगुसी पञ्चवीर सिरपाः स्वम्ह च्वमियात

येँ – नेपालभाषा टाइम्स न्हिपती पिहां वइगु बुद्ध धर्म सम्बन्धी बांलाःगु च्वसुयात दँय्दसं बीगु याना वयाच्वंगु पञ्चवीर सिंह सिरपाः म्हिगः लःल्हात । स्वयम्भूस्थित आनन्दकुटी विद्यापीठया हलय् जूगु उगु ज्याझ्वलय् मूपाहां नेपालभाषा मिसा खलःया नायः मंगला कारंजितं बु.सं. २५६०या उत्कृष्ट मिसा च्वमि ललिता ध्वाख्वाः व मिजं च्वमि माधवलाल प्रधानयात उगु सिरपाः लःल्हानादीगु खः ।

युवा बौद्ध समूहया ग्वसालय् समूहया नायः तेजनारायण मानन्धरया सभापतित्वय् जूगु उगु ज्याझ्वलय् सिरपाःया दाता पञ्चवीरसिंह तुलाधरं स्वक्वः तक पञ्चवीर सिरपाः त्याकादीम्ह च्वमि सुनिता मानन्धरयात नं विशेष सिरपाः न्हूगु नीस्वनादीगु ‘इलोहं पञ्चवीर परियत्ति सिरपाः’ यलया शाक्यसिंह विहारयात लःल्हानादीगु खः ।

ज्याझ्वलय् निर्णायक मण्डलया दुजःपिं डा. केशवमान शाक्य, मदन मानन्धर, इलोहंया सम्पादक नरेशवीर मानन्धर, नेपालभाषा टाइम्सया सम्पादक सुरेश मानन्धर, युवा बौद्ध समूहया अनिल स्थापितपिंसं नं न्ववानादीगु खः ।