ने. सं. ११४४ कौलाथ्व पारू - नःलास्वनेगु

अमेरिकाय् नं कुमारी सालीगु

येँ – अमेरिकाया वाशिंगटन डीसी महानगरय् थुगुसी कुमारीया रथ हे सालाः यँयाः पर्व न्यायेकीगु जूगु दु । अमेरिकाय् कुमारीया रथ सालाः पर्व न्यायेकेत्यंगु थ्वहे न्हापांखुसी खः । उकिया लागिं रथ दयेकेगु ज्या जुयाच्वंगु दु । नेवाः अर्गनाइजेशन अफ अमेरिका (एनओए) या ग्वसालय् थ्व ज्याझ्वः जुइत्यंगु खः । एनओएपाखें डीसी महानगरय् यँयाः पर्व न्यायेका वयाच्वंगु न्हय्दँ दयेधुंकल ।

थुगुसी च्याक्वःखुसी यँयाः न्यायेकेत्यंगु खः । थुगुसीया यँयाः पर्वय् कुमारीया रथ समेत सालीगु जूगुलिं थ्व न्हापाया स्वयां फरक जुइगु खँ एनओएया कार्यवाहक नायः पुष्कर प्रजापतिं ‘नेपालभाषा टाइम्स’ यात कनादिल । अमेरिकाय् हे न्हापांखुसी कुमारीया रथ सालाः थ्व जात्रा जुइत्यंगु खँ कँसें वय्कलं थौंकन्हय् रथ दयेकेगु ज्या थ्यंमथ्यं क्वचाःगु जानकारी नं बियादिल ।

थ्व येँय् सालीगु रथ थें च्वंक हे दयेकेगु ज्या जुयाच्वंगु दु । थुकिया उचाई १० फिट जुइ । रथय् दुने ७ दँ दुम्ह मिसा मचायात कुमारी दयेकाः आसनय् फ्यतुकेगु समेत ज्या जुइ । कावा नायः प्रजापतियाकथं थ्वहे वइगु यंलागा १२ (अक्टोबर ६ तारिख) कुन्हु डीसी महानगरया ब्ल्याकहिल रिजनल पार्क दुने थ्व यँयाः पर्व न्यायकेगु ज्या जुइ । कुमारीया रथ नं थ्वहे पार्क दुने चाःहीकी ।

प्रजापतियाकथं सम्भव दत धाःसा आकिवं पार्कं पिहां वयाः महानगरय् हे रथयात्रा न्ह्याकेगु बारे नं बिचाः जुयाच्वंगु दु । थुगुसीया यँयाः पर्वय् दशअवतार समेत क्यनेगु ज्या नं जुइ । लिसें न्हापा न्हापा थें लाखे, पुलुकिसि, महाकाली प्याखं आदि नं पिहां वइ ।येँय् धाःसा थौं कुमारी क्वःने सालीगु जूगु दु ।