‘विश्वभूमि’या सम्पादक सुशीलवीर सिंह कंसाकार मंत

येँ – नेपालभाषाया न्हिपौ ‘विश्वभूमि’ या सम्पादक व प्रकाशक सुशीलवीर सिंह कंसाकार मंत । वंगु बाःछि न्ह्यवंनिसें कोरोना संक्रमित जुयाः धापासीया ग्राण्डी अस्पतालय् वासः याकातःम्ह वय्कः म्हिगः वासः याकु याकुं मदुगु खः ।
मदुगु इलय् धाःसा कोरोना नेगेटिभ वयेधुंकूगु जूगुलिं वय्कःया अन्तिम संस्कार छेँजःपिंपाखें हे कर्णदीपय् यायेत्यनागु खँ वय्कःया दाजु जगतवीर सिंह कंसाकारं कनादीगु दु ।
मदुम्ह कंसाकार ५८ दँ दुम्ह खः । वय्कःया जहान लिसें छम्ह काय् दी । वि.सं. २०४५ सालय् नेपालभाषा ख्यलय् न्हिपौया अभाव जुयाच्वंगु इलय् वय्कःया हे नेतृत्वय् विश्वभूमि प्रकाशन प्रा.लि. नीस्वनाः अशोक श्रेष्ठया सम्पादनय् ‘विश्वभूमि’ न्हिपौ पिथनेगु शुरु जूगु खः । २०४६ सालया जनआन्दोलन ताकाय् अतिकं लोकंह्वाःगु उगु न्हिपौ झिदँ तक पिहां वयाः लिपा बन्द जूगु खः ।