ने. सं. ११४४ कौलाथ्व पारू - नःलास्वनेगु

वरिष्ठ गायक योगेश वैद्य मंत

येँ । वरिष्ठ गायक लिसें संगीतकार योगेश वैद्य मंत । वयकः विहीवाः चान्हसिया १२ः३० बजे मदुगु खः ।
विहीवाः न्हिनय् स्वास्थ्यय् छुं भचा समस्या पिहां वःगु खःसां चान्हय् तच्वः जुयाः अस्पताल यंकूगु खःसा अन हे वासः याकुयाकुं मदुगु खँ छेँजःपिंसं धाःगु दु ।
गायक वैद्यया शिष्या लिसें नेपालभाषाया गायिका रीता महर्जनं कनादी कथं न्हिनय् भचा बान्ता जुयाः छुं भचा वय्कः बेहोस जुयादीगु खः । थज्याःगु समस्या न्हापा न्हापा नं जूगु जुयाः ‘रिकभर’ जुइ धकाः आशा याःगु खःसां लिपा सासः ल्हायेत समस्या जुइवं वयकःयात येँया लुँहितिइ च्वंगु काठमाडौं भ्याली अस्पतालय् यंकूगु खः ।
वयकःयात चान्हय् १२ बजे अस्पताल यंकाः आईसीयुलय् भर्ना याःगु खःसा १२ः३० बजे वासः याकुयाकुं मदुगु खँ महर्जनं कनादिल ।
गायक वैद्य ७७ दँ दुम्ह खः । वयकःया म्ह्याय् निम्ह व काय छम्ह दी । वंगु माघ १ गते घ्यःचाकु संल्हू कुन्हु तिनि वयकःयात गंकी धुस्वां–बसुन्धरा प्रतिष्ठानपाखें ‘धुस्वां सायमि सिर्जना सिरपाः’ लःल्हाःगु खः ।
सिरपाः समारोहय् वयकः थः हे उपस्थित जुइ मफुगु खःसां भिडियो सन्देशपाखें थःगु मन्तव्य तयादीगु खः । उगु इलय् वयकःया स्वास्थ्यय् खास छुं समस्या मदुगु खः । अबले वयकःया काय लोकेश वैद्यं सिरपाः लःल्हानाः कयादीगु खः ।
मदुम्ह योगेश वैद्यं नेपालभाषा व खस नेपाली भाय्या आपालं लोकंह्वाःगु म्ये हालादीगु दु । नेपाली भाषाय् वयकःया म्ये ‘सपना भुलाइ सारा आँशु लिएर जाऊ…’, ‘मेरो आँशुमा नहाँसे….’, ‘नेपाल मेरो उपहार भो…’ आदि तसकं लोकंह्वाः । अथे हे नेपालभाषाय् ‘जय नमो सिरि बुद्ध भगवान…’, ‘जिमि यःम्ह थौं जिथाय् वइ….’ आदि अतिकं लोकंह्वाः । लिपांगु इलय् वयकलं गायिका रीता महर्जनलिसे जानाः न्हूगु नेवाः म्ये कम्पोज यायेगु लिसें पुलांगु म्येयात न्हूकथं हालेगु ज्या यानादीगु खः ।
शुक्रवाः पशुपतिइ वयकःया अन्तिम संस्कार यायेगु तयारी दुगु खँ छेँजःपिंसं कनादीगु दु ।