ने. सं. ११४४ कछलागा षष्ठी -

महाकवि सिद्धिदासया लुमन्तिइ ज्याझ्वः

येँ (नेपालभाषा टाइम्स) – विश्व नेवाः संगठनया ग्वसालय् महाकवि सिद्धिदास महाजुया १५३ क्वःगु बुदिंया लसताय् छगू ज्याझ्वः जुल । जूम अनलाइनया माध्यमं वंगु यलागा दशमिकुन्हु जूगु ज्याझ्वः दबूया केन्द्रीय नायः सिजन श्रेष्ठया सभापतित्वय् जूगु खः ।

ज्याझ्वलय् जनकवि दुर्गालाल श्रेष्ठ मूपाहांकथं झायादीगु खःसा विशेष पाहाकथं नेवाः न्ह्यलुवा मल्ल के. सुन्दर, साहित्यकार हितकरवीर सिं कसाः, प्रा. प्रेमशान्ति तुलाधर, नांजाःम्ह म्येँ हालामिलिसें महाकवि सिद्धिदासया छुइ योगेश्वर अमात्य, दबूया संस्थापक दुजः दया शाक्य झायादीगु खः ।

दबूया केन्द्रीय नायः श्रेष्ठं लसकुस यानादीगु ज्याझ्वलःया उलेज्या मूपाहां जनकवि दुर्गालालं यानादीगु खः । म्येँ हालामि पवित्र कसाःजुं सिद्धिदासया लुमन्तिइ च्वयातःगु नसंचा म्येँ ‘थौंया दिन कवि गुरु सिद्धिदास बूगु रे’ हाला न्यंकादीगु ज्याझ्वलय् मूपाहां जनकवि दुर्गालालं सिद्धिदासलिसें वय्कःया लुमन्तिइ जुयाच्वंगु ज्याझ्वःयात कयाः थःगु नुगःखँ प्वंकादीगु खः ।

विशेष पाहां शताब्दीपुरुष सत्यमोहन जोशीया भिडियो सन्देश न्ह्यब्वःगु ज्याझ्वलय् प्रा. प्रेमशान्ति तुलाधरं महाकवि सिद्धिदासया जीवनी व कृतिया बारे कनादीगु खःसा साहितयकार हितकर वीर सिं कसाःजुं सिद्धिदासया जीवनीलिसे स्वापू दुगु बाखं लिसें पाठ्यक्रमय् सिद्धिदास बारे कनादीगु खः ।

ज्याझ्वलय् रुसय् च्वनादीम्ह कृष्णप्रकाश श्रेष्ठं सिद्धिदासया चिनाखँ रुसी भासं ब्वनाः न्यंकादीगु खःसा दबूया गुडविल एम्बेस्डर कृष्ण चखुंजुं नं सिद्धिदासया चिनाखँ ब्वनाः न्यंकादीगु खः । मेम्ह विशेष पाहां मल्ल के. सुन्दरं महाकवि व नेपालभाषा आन्दोलनया विषयय् नुगःखँ तयादीगु ज्याझ्वलय् दीपक तुलाधर, योगेश्वर अमात्यं नं नुगःखँ तयादीगु खः । लोककवि राजभाई जकःमिं सिद्धिदासया लमुन्तिइ च्वयादीगु चिनाखँ न्यंकादीगु ज्याझ्वलय् मूदुजः विमल श्रेष्ठं सुभाय् देछानादीगु खःसा छ्यांजे रश्मिला प्रजापतिं ज्याझ्वः न्ह्याकादीगु खः ।