ज्यापु समाजयात विद्यार्थी युनियनया ज्ञापन पौ

येँ(नेपालभाषा टाइम्स)-रत्न राज्यलक्ष्मी (आरआर) क्याम्पसया नेवाः विद्यार्थीतय् संगठन नेवाः विद्यार्थी युनियनं ज्यापु समाज यलयात छपु ज्ञापन पौ लःल्हाःगु दु । युनियनं स्नातक व स्नातकोत्तर तहय् नेपालभाषा विषय अध्ययन याइपिं विद्यार्थी भर्नाया माग यासें समाजयात ज्ञापन पौ लःल्हाःगु खः ।

नेपालभाषा विषय अध्ययन याइपिं विद्यार्थी भर्ना मजुल धाःसा नेपालभाषाया कक्षा हे बन्द जुइगु धासें युनियनं समाजयात ज्ञापन पौ लःल्हाःगु खः । स्नातक (बीए) तगिमय् आरआर क्याम्पसय् झिम्ह, पद्मकन्या क्याम्पसय् न्याम्ह विद्यार्थी भर्ना मजुल धाःसा बीए तगिमय् नेपालभाषा कक्षा चले मयायेगु धइगु सुचं वःगु भाषा संरक्षणया निंतिं व संविधानं बिउगु अधिकारयात लागू यायेगु निंतिं नं विद्यार्थी भर्ना यायेमाःगु युनियनं धाःगु दु ।

वइगु मंसिर १५ गते तकया दुने नेपालभाषा विषय अध्ययन याइपिं विद्यार्थी भर्नाया निंतिं पहल यायेत सम्बद्ध पक्षयात अपील यासें युनियनया नायः रिदेन महर्जन व छ्याञ्जे प्रशान्त डंगोलं समाजयात ज्ञापन पौ लःल्हाःगु खः ।

युनियनं लःल्हाःगु ज्ञापन पती संविधानय् हे थःथःगु मांभासं शिक्षा काये दइगु व्यवस्था जुयाच्वंगु धासें संविधानय् दुगु अधिकारयात सुनिश्चित यायेत सकसिनं मांभासं शिक्षा कायेत नेतृत्वदायी भूमिका म्हितेमाःगु खँय् बः बियातःगु दु ।

युनियनया हे कुतलय् आरआर क्याम्पसय् २०७४ निसें स्नातक व २०७८ निसें एमए तमिगय् नेपालभाषा विषय हाकनं ब्वंकेगु ज्या न्ह्याकूगु खः ।

सम्बन्धित बुखँ

LEAVE YOUR COMMENTS