शिकागोय् सत्यमोहनयात लुमंकाः न्हूदँ हन

येँ(नेपालभाषा टाइम्स)- नेवाः अमेरिकन दबू, शिकागों नं नेपाल संवत् ११४३ न्हूदँ हंगु दु । अमेरिकाया शिकागोय् च्वंपिं नेवाःतय्सं वाङ्मय शताब्दी पुरुष सत्यमोहन जोशीयात लुमंकाः वय्कःप्रति श्रद्धाञ्जली देछासे छगू मिनेट मौन धारण यानाः न्हूदँ हंगु खः ।

ज्याझ्वलय् मूपाहांकथं झायादीपिं कृष्णहरि श्रेष्ठ व मंगलदेवी श्रेष्ठ निम्ह तिपुलिं गणेद्यः पुज्यानाः व मेम्ह मूपाहांकथं झायादीपिं कर्ण जोशी व तुलसा जोशी निम्ह तिपुलिं त्वाःदेवाय् मत च्याकाः ज्याझ्वःया उलेज्या यानादीगु खः ।

दबूया नायः किरण ब्यञ्जनकारं लसकुस यानादिसें थःपिनिगु कार्यकाल क्वचाःगु व न्हूगु ज्यासना पुचलय् ज्या याये न्ह्याःपिंत च्वनाः ज्या यायेत नं इनाप यानादीगु खः ।

दबूया पुलांम्ह नायःलिसें वरिष्ठ साहित्यकार केशरमान ताम्राकारं शताब्दी पुरुष जोशीयात लुमंकादिसें मदुम्ह जोशी नेवाः अमेरिकन दबू व शिकागोया नेवाःलिसे तसकं क्वातुगु स्वापू दुम्ह व्यक्तित्व जूगु खँ न्ह्यथनादिल । ने.सं. ११३१य् शिकागोय् न्हूदँ हनागु इलय् वय्कलं भिंतुना पौ छ्वया हयादीगु नं जानकारी बियादीगु खः ।

उगु इलय् सांस्कृतिक ब्वज्या नं जूगु खः । सांस्कृतिक ज्याझ्वलय् नविन महर्जन, कृष्णहरि श्रेष्ठ, इच्छा श्रेष्ठ, नूर महर्जन, क्षितिज कक्षपति श्रेष्ठ व विनय खड्गीं नेवाः म्येँ न्ह्यब्वयादीगु खः । ज्याझ्वः न्ह्याकादीम्ह दबूया छ्याञ्जे सिम्रिकमान तुलाधरं दबुलिं याना वयाच्वंगु ज्याझ्वःया बारे जानकारी बियादीगु खः ।