नेवाः देय् दबू ख्वपया न्हापांगु दँमुँज्या

ख्वप(नेपालभाषा टाइम्स)- नेवाः देय् दबू ख्वप नगर समितिया न्हापांगु दँ मुँज्या, नेवाः मिसा दबू ख्वप जिल्ला समितिया न्हापांगु दँमुँज्या व नेवाः मिसा दबू ख्वप नगर समितिया न्हापांगु दँमुँज्या मंकाः कथं जुल । नेवाः देय् दबू स्वनिगः विशेष प्रदेशया न्वकु सुमन श्रेष्ठं शनिवाः स्वंगुलिं संगठनया मंकाः दँमुँज्या त्वाःदेवाय् मत च्याकाः उलेज्या यानादिल । ज्याझ्वलय् वय्कलं वंगु भाद्र महिनाय् छवाःयंकं जूगु उद्घोषण तालिम व लछियंकं जूगु नेपाल लिपि प्रशिक्षणया प्रशिक्षार्थीतय्त दसिपौ लःल्हानादिल । नापं लिपि प्रशिक्षक योगी स्यस्यः व उद्घोषण तालिमया प्रशिक्षक कृष्ण प्रजापतियात हनापौ लःल्हानादिल ।

नेवाः देय् दबू ख्वप नगर समितिया नायः कृष्णप्रसाद प्रजापतिया संयोजकत्वय् जूगु ज्याझ्वलय् मूपाहां सुमन श्रेष्ठं दशकौंनिसें व्यक्तिगत व सांगठनिक रुपं नेवाः आन्दोलन न्ह्यानाच्वंगु दुसा आः झीसं उकी गुलि पूवन व गुलि पूमवंनि धयागु मूल्यांकन यानाः न्हून्हूगु उपाय नालाः वर्तमान आवश्यकता व परिस्थिति थुइका न्ह्यःने वनेमाःगु सुभाव बियादिल । ज्याझ्वलय् नेवाः देय् दबू ख्वप जिल्लाया अध्यक्ष नरेश नेवालं विभेदकारी सरकारी भाषा नीतिया विरोध आवश्यक जूगु न्ह्यथनादिसें थःपिंत हेवाय् चवाय् यानाच्वंगु ध्वाथुइका थःपिंसं नं उकिया प्रतिकार यायेमाः धयादिल ।

नेवाः देय् दबू ख्वप नगर समितिया सल्लाहकार कृष्ण प्रजापतिं नेवाः देय् दबू नीस्वंगुया उपाद्यता व वर्तमान इलय् नेवाः देय् दबू देय्न्यंकंया नेवाः समुदाययात छप्पँ छधि यायेत म्हिताच्वंगु भूमिका बारे कनादिल । ज्याझ्वलय् नेत्र रोग विशेषज्ञ डा. नविना सुवालं मिखा सुख्खा जुइगु ल्वय् व उकिं बचे जुइगु उपाय बारे कनादिल ।

समारोहय् नेवाः देय् दबू ख्वप नगर समितिया नायः कृष्णप्रसाद प्रजापतिं वार्षिक प्रगति प्रतिवेदन न्ह्यब्वयादीगु खःसा नेवाः मिसा दबू ख्वप जिल्ला समितिया कोषाध्यक्ष निरु कर्माचार्यं आर्थिक प्रतिवेदन न्ह्यब्वयादीगु खः । नेवाः मिसा दबू ख्वप नगर समितिया सुनिता कर्माचार्यं भिंतुना न्वचु बियादीगु खः ।

नेवाः मिसा दबू ख्वप जिल्ला अध्यक्ष सरिता दुवालया सभापतित्वय् जूगु दँमुँज्याय् योगी स्यस्यं सुभाय् देछानादीगु खःसा ललिता अमात्यं लसकुस यानादीगु खः ।