ज्यापु महागुथि नेपाः येँया दँमुँज्या

येँ (नेपालभाषा टाइम्स)÷ ज्यापु महागुथि नेपाः येँ महानगर समितिया दँमुँज्या म्हिगः जुल । समितिया नायः पंचनारायण महर्जनया सभापतित्वय् जूगु ज्याझ्वलय् मूपाहां येँ महानगरपालिकाया उपप्रमुख सुनिता डंगोलं त्वाः देवाय् मत च्याका उलेज्या यानादीगु खः ।

ज्याझ्वलय् नवासें मूपाहां डंगोलं महानगरया दक्वं स्कुलय् नेपालभाषा विषय लागू यायेधुंकाः आः नं मस्तय्सं स्कुलय्, छेँय् नेवाः भासं खँ मल्हाः धासें छेँ थः मांअबु, बाज्याअजिपिंसं नं मस्तलिसे मसः मसः खय् भासं खँ ल्हानाच्वनीगु अवस्था कायम हे दुगु खँ कनादिल ।

अझ थौंकन्हय् खय् भाय् जक मखु अंग्रेजी भाय् हे मफु मफु खँ ल्हानाः नं सयेकेगु यानाच्वंगु दु धासें वय्कलं न्हू न्हूगु भाय् सयेकेगु बांलाःगु पक्ष खःसा मेगु भाय् सयेकेगु झ्वलय् थःगु मांभाय् ल्वमंका वनेगु धइगु व स्वयां तःधंगु घातक मेगु जुइ मखु धयादिल ।

वय्कलं धयादी ‘झी अजाअपिंसं झीत झीगु मांभाय् त्वःताः मथुकूगु खःसा वय्कःपिंसं त्वःता वंगु छेँबुँ धनसम्पतिया नं छुं मू दइमखु । अज्याःगु सम्पति थौं दःसा कन्हय् मदया वनेफु तर भाय् अज्याःगु गहन विषय खः गुगु पुस्तान्तरण याना मवनेगु खःसा छगू पुस्ता जक ग्याप जुइसाथं व धुंकाः झीगु भाय् तनावनी । उकिं सकलें अजाअजि, मांअबु, दाजुकिजा तताःकेहें व मस्तलिसे झीसं झीगु थःगु हे मांभासं खँ ल्हायेगु यायेमाः ।’

नेवाःत थौंकन्हय् भाषिक, सामाजिक सांस्कृतिक रुपं सचेत जुजुं वनाच्वंगु खँ न्ह्यथनादिसें उकियात अझ च्वन्ह्याका यंकेमाःगु खँय् नं बः बियादिसें राजनीतिक रुपं नं नेवाःत सचेत जुइमाःगु खँय् बः बियादिल । राजनीतिइ वनीपिंत झीसं हस्तेलय् हाइस्ते यानाः तिबः बीमाः धयादिल । राजनीति याइपिंत थासय् थ्यंके फःसा हे जक झीगु खँ नं थासय् थ्यनी धयादिल ।

ज्यापु महागुथि नेपाः केन्द्रीय समितिया नायः लोककवि राजभाई जकःमि, ज्यापु संस्कृति विकास कोषया नायः मंगलकृष्ण सिंह, येँमपा २२ वडाअध्यक्ष चिनिकाजी महर्जन, येँमपा १५ वडाअध्यक्ष ईश्वरमान डंगोल, १२ वडाया अध्यक्ष बालकृष्ण महर्जन व समितिया निवर्तमान नायः बाबुराजा महर्जन विशेष पाहांकथं झायादीगु खः ।

ज्याझ्वलय् येँ महानगर समितिया छ्याञ्जे मचाराजा महर्जनं वार्षिक प्रगति प्रतिवेदन, संगठन कवःया नानीहिरा महर्जनं भवन निर्माणया अवधारणा, मिसा कवःया सजनी महर्जन, शिक्षा, कानून व संचार कवःया दिनेश महर्जनं नं थःथःगु कवःया विवरण न्ह्यब्वयादीगु खः । अथे हे आर्थिक कवःया जुजुकाजी महर्जनं समितिया भावि कार्ययोजना न्ह्यब्वयादीगु ज्याझ्वलय् युवा, स्वास्थ्य व अतिरिक्त कवः लिसें भूमि आयोग येँ जिल्लाया नायः श्यामकृष्ण प्रजापतिं भूमि आयोग व सुकुम्बासी विषयस नुगःखँ तयादीगु खः ।

ज्याझ्वलय् थीथी ख्यःया व्यक्तित्वपिंत सम्मान नं याःगु दु ।