क्यब्वया विद्यालयस्तरीय किपा च्वज्या कासा

येँ(नेपालभाषा टाइम्स)- क्यब्व ‘दि गार्डेन फर लर्नर्स’या ग्वसालय् विद्यालयस्तरीय किपा च्वज्या धेंधेंबल्लाः कासा जुल । क्यब्वया सदस्य स्कुल टाइम्स इन्टरनेशनल स्कुल सीतापाइलाया संयोजनय् विद्यालयस्तरीय ‘क्यब्व इन्टर स्कुल आर्ट कम्पिटिशन–२०७९’ कासा जूगु खः ।

सिनियर व जुनियर निगू पुचलय् जूगु किपा च्वज्या कासाय् सिनियर पुचलय् ‘सांस्कृतिक सम्पदाया मू’ व जुनियर पुचलय् ‘झीगु नखः’ विषयय् कासा जूगु खः । कासाय् थीथी स्कुलया पीम्ह विद्यार्थीं ब्वति काःगु खः ।

जुनियर पुचलय् सजगता मानन्धर (टाइम्स स्कुल) न्हाप, नौरीन अन्सारी (फ्युचर स्टार इं. स्कुल) लिउ, मायुश गौडेली (फ्युचर स्टार इं. स्कुल) लियांलिउ लाःगु खःसा सलौदिन अन्सारी (एभरेष्ट इनोभेटिभ स्कुलं) हःपाः सिरपाः त्याकेत ताःलाःगु खः ।

अथे हे सिनियरपाखे साक्षी सिंह (काठमाडौं मोडेल स्कुल) न्हाप, फर्दिन अन्सारी (एभरेष्ट इनोभेटि स्कुल) लिउ, सबिना न्यौपाने (स्वयम्भू इं. स्कुल) लियांलिउ व कृतिका शाही (एभरेष्ट इनोभेटिभ स्कुलं) हःपाः सिरपाः त्याकल ।

कासाय् विजयी जुयादीपिं विद्यार्थीलिसें स्कुलयात मूपाहांलिसें निर्णायककथं झायादीम्ह नांजाःम्ह कार्टुनिष्ट रविन साय्मि, टाइम्स इन्टरनेशनल स्कुलया प्रिन्सिपल पल्पसा महर्जन, कजि राजेन्द्र महर्जनं सिरपाः, ट्रफि, दसिपौ लःल्हानादीगु खः ।

ज्याझ्वलय् नवासें मूपाहां कार्टुनिष्ट साय्मिं थःगु अनुभव कनादिसें छुं नं ज्या यायेबलय् मेहनत व धैर्यता दयेमाः धासें थ्व मंत न्ह्यागु ज्या याःसां ताःलाइमखु धयादिल । ज्याझ्वलय् फ्युचर स्टार इंग्लिश स्कुलया मनोजकुमार श्रेष्ठं मूपाहां साय्मियात मतिनाया चिं लःल्हानादीगु खः ।