डाक्टरतय् न्हूगु विरोध कार्यक्रम

येँ – स्वास्थ्य शिक्षा विधेयक विरुद्ध अनसन च्वनाच्वंम्ह डा. गोविन्द केसीया समर्थनय् नेपाल चिकित्सक संघं न्हूगु आन्दोलन घोषणा याःगु दु । चिकित्सक संघं आवासीय चिकित्सकतय्सं सञ्चालन यानाच्वंगु बहिरंग व अन्तरंग सेवा बहिष्कार ज्याझ्वःप्रति ऐक्यबद्धता प्वंकूगु दु ।

लिसें देय्न्यंकंया चिकित्सकतय्त थः कार्यरत स्वास्थ्य संस्थाया नियमित ओपीडी टिकट बहिष्कार यायेत व वैकल्पिक उपायपाखें सेवा बीत नं आह्वान याःगु दु । संघं थःगु फुक्कं शाखा व देय्न्यंकंया स्वास्थ्य संस्थायात प्यंगू बुँदाया निर्देशन बिसें आन्दोलनयात समर्थन याःगु खः ।
देय्न्यंकंया चिकित्सकतय्त थःथःगु जिल्लाय् रिले अनसन, ¥याली, धर्ना लगायतया विरोध ज्याझ्वः यायेत व नागरिक समाज लिसे जानाः सशक्त विरोधय् कुहां वनेत नं निर्देशन बिउगु दु ।

स्वनिगःया चिकित्सकतय्सं धाःसा बसन्तपुली सुथय् १० बजे निसें ५ बजे तक अनसन च्वनेगु निर्णय याःगु दु ।थ्वहे झ्वलय् डा. केसीया स्वास्थ्य गम्भीर जुयाः वनाच्वंसां सरकारं धाःसा डा. केसीया माग बारे सहलह यायेगु कथं छुं हे तयारी मयानाच्वंगु द्वपं चिकित्सकतय्सं बिउगु दु ।

सरकार व केसीया प्रतिनिधि दथुइ वार्ता यायेगु सम्बन्धय् कयाच्वंगु अडानया कारणं वार्ताया वातावरण तयार मजुयाच्वंगु खः । सरकारं निःशर्त वार्ता यायेमाः धकाः धयाच्वंगु दुसा डा. केसीया प्रतिनिधिपिंसं धाःसा न्हापा सदनय् दर्ता जुइधुंकूगु चिकित्सा शिक्षा विधेयक लित कायेमाःगु अडान कयाच्वंगु दु ।

मेखे अनसन च्वनाच्वंम्ह डा. केसीया स्वास्थ्यस्थितिया जानकारी कायेत म्हिगः पुलांम्ह राष्ट्रपति डा. रामवरण यादव त्रिवि शिक्षण अस्पताल झाःगु दु । वय्कलं डा. केसीया स्थिति संवेदनशील जूगु धासें सरकारया ध्यानाकर्षण नं यानादीगु दु ।